ഓര്‍ഗന്‍ പഠിക്കാനെത്തിയ പതിനാറുകാരിയെ പീഡിപ്പിച്ചു; അധ്യാപകനു ജീവപര്യന്തം തടവ്

തളിപ്പറമ്പ് : സംഗീതം പഠിക്കാന്‍ എത്തിയ 16 വയസ്സുകാരിയെ പീഡിപ്പിച്ച സംഗീത അധ്യാപകന് ജീവപര്യന്തം കഠിനതടവും ഒരു ലക്ഷം രൂപ പിഴയും വിധിച്ചു. പെണ്‍കുട്ടിയുടെ ചിത്രങ്ങള്‍ പരസ്യപ്പെടുത്തുമെന്നു ഭീഷണിപ്പെടുത്തിയതിനു രണ്ടു വര്‍ഷം കഠിന തടവും വിധിച്ചിട്ടുണ്ട്. ആലക്കോട് കാര്‍ത്തികപുരം അട്ടേങ്ങാട്ടില്‍ ജിജി ജേക്കബിന്(50) ആണ് ശിക്ഷ വിധിച്ചുകൊണ്ട് തളിപ്പറമ്പ് അതിവേഗ പോക്‌സോ സ്‌പെഷല്‍ കോടതി ജഡ്ജി സി.മുജീബ് റഹ്‌മാന്‍ ഉത്തരവിട്ടത്. 2015ല്‍ കരുവഞ്ചാലിലെ സംഗീത പഠന സ്ഥാപനത്തില്‍ അവധിക്കാലത്ത് ഓര്‍ഗന്‍ പഠിക്കാനെത്തിയതായിരുന്നു പെണ്‍കുട്ടി. ഓര്‍ഗന്‍ അധ്യാപകനായ ജിജി ജേക്കബ് പല ദിവസങ്ങളായി പെണ്‍കുട്ടിയെ സ്ഥാപനത്തില്‍ വച്ച് പീഡിപ്പിച്ചു എന്നായിരുന്നു പരാതി. സംഭവം അക്കാലത്ത് എറെ വിവാദമുയര്‍ത്തിയിരുന്നു. കേസില്‍ 15 സാക്ഷികളെ വിസ്തരിച്ചിരുന്നു. പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ ഷെറി മോള്‍ ജോസ് ഹാജരായി. അന്നത്തെ ആലക്കോട് സിഐ പി.കെ.സുധാകരനാണ് കേസ് അന്വേഷിച്ചത്.