പാര്‍ട്ടി കോണ്‍ഗ്രസ്: രാജ്യാന്തര ചലച്ചിത്ര മേള തുടങ്ങി

കണ്ണൂര്‍: സിപിഐ എം 23ാം പാര്‍ട്ടി കോണ്‍ഗ്രസിന്റെ ഭാഗമായി സംഘടിപ്പിക്കുന്ന രാജ്യാന്തര ഓണ്‍ലൈന്‍ ചലച്ചിത്ര മേളയ്ക്ക് തുടക്കമായി. പ്രശസ്ത ബംഗാളി സംവിധായകനും തിരക്കഥാകൃത്തും നടനുമായ ഗൗതം ഘോഷ് ഉദ്ഘാടനം ചെയ്തു. ലോകമെങ്ങും ഫാസിസം അതിന്റെ ജനവിരുദ്ധത കൂടുതല്‍ പ്രകടമാക്കുന്ന ഈ കാലത്ത് ശക്തമായ ബഹുജനമാധ്യമമെന്ന നിലയില്‍ സിനിമ കൂടുതല്‍ പ്രസക്തമാവുകയാണെന്ന് ഗൗതം ഘോഷ് അഭിപ്രായപ്പെട്ടു. ലോകമെമ്പാടുമുള്ള ജനങ്ങളുടെ ചരിത്രവും കൂട്ടായ ഓര്‍മകളും രേഖപ്പെടുത്തുന്ന ഏറ്റവും ശക്തമായ ഭാഷയാണ് സിനിമ. ജനങ്ങളുടെ ജീവിതവും പോരാട്ടവുമെല്ലാം സിനിമയിലൂടെ രേഖപ്പെടുത്തുന്നുണ്ട്. ഈ പ്രതിസന്ധി ഘട്ടത്തിലും സിനിമ ജനകീയ പ്രതിരോധങ്ങളുടെ മുന്‍നിരയിലുണ്ടാകണം- ഗൗതം ഘോഷ് പറഞ്ഞു. പ്രശസ്ത ബ്രിട്ടീഷ് സംവിധായകന്‍ കെന്‍ ലോച്ചിന്റെ 'സോറി വി മിസ്ഡ് യു' ആയിരുന്നു ഉദ്ഘാടനചിത്രം. അമേരിക്കന്‍ സംവിധായകനായ സ്റ്റീവന്‍ സോഡര്‍ബര്‍ഗ് ചെഗുവേരയുടെ ജീവിതത്തെ ആസ്പദമാക്കി 2008ല്‍ സംവിധാനം ചെയ്ത ചെ: പാര്‍ട്ട് വണ്‍, ഓസ്‌കാര്‍ പുരസ്‌കാരം നേടിയ ജോജോ റാബിറ്റ്, നാഗരാജ് മഞ്ജുളെയ്ക്ക് മികച്ച നവാഗത സംവിധായകനുള്ള ദേശീയപുര്‌സകാരം നേടിക്കൊടുത്ത മറാത്തി ചിത്രം ഫാന്‍ഡ്രി എന്നിവയാണ് ആദ്യ ദിനം പ്രദര്‍ശിപ്പിച്ച മറ്റു ചിത്രങ്ങള്‍. ഉദ്ഘാടനച്ചടങ്ങില്‍ സിപിഐ എം കണ്ണൂര്‍ ജില്ലാ സെക്രട്ടറി എം വി ജയരാജന്‍ ഉദ്ഘാടന അധ്യക്ഷനായി. മീഡിയാ ക്രിയേറ്റീവ് സബ് കമ്മിറ്റി ചെയര്‍മാന്‍ ഷെറി ഗോവിന്ദന്‍ സ്വാഗതവും പി സന്തോഷ് നന്ദിയും പറഞ്ഞു. ഏപ്രില്‍ നാല് വരെ അഞ്ച് ദിവസങ്ങളിലായി 20 ചിത്രങ്ങളാണ് പീപ്പിള്‍സ് ഫിലിം ഫെസ്റ്റിവലില്‍ പ്രദര്‍ശിപ്പിക്കുക. peoplesfilmfestival.com എന്ന വെബ്സൈറ്റിലൂടെ ഓണ്‍ലൈനായാണ് പ്രദര്‍ശനം. ഓരോദിവസവും നാല് പുതിയ ചിത്രങ്ങള്‍ സിനിമാസ്വാദകര്‍ക്കായി വെബ്‌സൈറ്റില്‍ ലഭ്യമാക്കും. വെള്ളിയാഴ്ച റോക്കറ്റ്, വിസാരാണെ, ചെ: പാര്‍ട്ട് 2, അവര്‍ ഒഫ് ഫര്‍ണസ് എന്നീ ചിത്രങ്ങള്‍ കാണാം.