സൗദിയുമായി താല്‍ക്കാലിക വെടിനിര്‍ത്തല്‍ പ്രഖ്യാപിച്ച് ഹൂതി വിമതര്‍

സൗദിയുമായി മൂന്ന് ദിവസത്തെ വെടിനിര്‍ത്തല്‍ പ്രഖ്യാപിച്ച് യെമനിലെ ഹൂത്തി വിമതര്‍. മിസൈല്‍, ഡ്രോണ്‍ ആക്രമണങ്ങളും മുഴുവന്‍ സൈനിക നടപടികളും താല്‍ക്കാലികമായി നിര്‍ത്തിവച്ചതായി ഹൂതി നേതാവ് മഹ്ദി അല്‍ മഷാത്ത് അറിയിച്ചു. അതേസമയം സൗദി ഇതുവരെ പ്രതികരിച്ചിട്ടില്ല. സൗദി ഫോര്‍മുല വണ്‍ മത്സരത്തിന് മുന്നോടിയായി ജിദ്ദയില്‍ ആക്രമണം നടത്തിയതിന് പിന്നാലെയാണ് സുപ്രധാന പ്രഖ്യാപനം. വെള്ളിയാഴ്ച ഹൂതി വിമതര്‍ നടത്തിയ ആക്രമണത്തില്‍ അരാംകോയുടെ രണ്ട് എണ്ണ സംഭരണികള്‍ക്കു തീ പിടിച്ചെങ്കിലും ആളപായമുണ്ടായില്ല. ഈ ആഴ്ച അവസാനം ഫോര്‍മുല വണ്‍ സൗദി ഗ്രാന്‍പ്രി കാറോട്ട മല്‍സരം നടക്കുന്ന വേദിയുടെ സമീപമായിരുന്നു ആക്രമണം. ഹൂതി ആക്രമണത്തിന് മറുപടിയായി യെമന്‍ തലസ്ഥാനമായ സനായിലും ഹുദെയ്ദായിലും സൗദി കനത്ത വ്യോമാക്രമണം നടത്തിയിരുന്നു. ആഗോള ഊര്‍ജ മേഖലയെ സംരക്ഷിക്കാനും എണ്ണവിതരണ ശൃംഖല തകരാതെ കാക്കാനുമാണ് തിരിച്ചടിച്ചതെന്ന് സഖ്യം വ്യക്തമാക്കി. ആക്രമിക്കപ്പെട്ട, ജിദ്ദ രാജ്യാന്തര വിമാനത്താവളത്തിനു തെക്കുകിഴക്കുള്ള നോര്‍ത്ത് ജിദ്ദ ബള്‍ക്ക് പ്ലാന്റില്‍ മുന്‍പും ഹൂതികള്‍ ആക്രമണം നടത്തിയിട്ടുണ്ട്.