‘കാടുവെട്ടാന്‍ വാള്‍ വേണം, പണം പ്രശ്‌നമല്ല’; കൊല്ലാനുള്ള ആയുധം തേടി ആലയിലെത്തി

കാടുവെട്ടാന്‍ നീളം കൂടിയ വാള്‍ വേണമെന്ന് ആവശ്യപ്പെട്ടാണ്, പാലക്കാട് എലപ്പുള്ളിയിലെ സഞ്ജിത്തിനെ കൊലപ്പെടുത്താനുള്ള വാള്‍ പണിതീര്‍ത്തതെന്നു മൊഴി. കഴിഞ്ഞദിവസം അറസ്റ്റിലായ മുതലമട സ്വദേശി ഷാജഹാനാണു ഗോവിന്ദാപുരത്തെ ആലയില്‍ ഇരുമ്പെത്തിച്ച് വാള്‍ പണിത് വാങ്ങിയത്. ഷാജഹാനെ വിവിധ ഇടങ്ങളിലെത്തിച്ചു പൊലീസ് തെളിവ് ശേഖരിച്ചു. വീടിനോടു ചേര്‍ന്ന് ഏറെ ദൂരം കുറ്റിക്കാടുണ്ട്. പന്നിശല്യവും രൂക്ഷമാണ്. കാട് വെട്ടിത്തെളിക്കാന്‍ നീളം കൂടിയ വാള്‍ വേണമെന്നുമാണു ഷാജഹാന്‍ അറിയിച്ചത്. പണിയാനുള്ള ഇരുമ്പ് ഷാജഹാന്‍തന്നെ എത്തിച്ചു. പണം പ്രശ്‌നമല്ലെന്നും വേഗം പണിതീര്‍ത്തു നല്‍കണമെന്നും ആവശ്യപ്പെട്ടു. നിശ്ചിത സമയത്തിനുള്ളില്‍ പണിതീര്‍ത്തെന്ന് അറിയിച്ചതിന് പിന്നാലെ വരികയും അധികപണം നല്‍കിയ ശേഷം വാള്‍ കൊണ്ടുപോകുകയും ആയിരുന്നുവെന്ന് ആല ഉടമ പൊന്നുച്ചാമി പറഞ്ഞു. ഇയാളെ മുന്‍ പരിചയമുണ്ടായിരുന്നതിനാല്‍ മറ്റു സംശയങ്ങളുണ്ടായില്ലെന്നും അദ്ദേഹം വ്യക്തമാക്കി. ഷാജഹാന്‍ എത്തിച്ച ആയുധങ്ങള്‍ ഉപയോഗിച്ചാണു കൊല നടത്തിയതെന്നാണു പൊലീസ് നിഗമനം. കണ്ണനൂരില്‍ ദേശീയപാതയോരത്തുനിന്നു കണ്ടെത്തിയ ആയുധങ്ങളാണോ എന്നു തിരിച്ചറിയാന്‍ ഫൊറന്‍സിക് ഫലം വരുന്നതുവരെ കാത്തിരിക്കണം. ഷാജഹാനെ കൂടുതല്‍ ഇടങ്ങളിലെത്തിച്ചു പൊലീസ് തെളിവ് ശേഖരിക്കും. നേരിട്ട് കൊലയില്‍ പങ്കെടുത്ത മൂന്നു പേരെയും സഹായിച്ച ഒരാളെയും കണ്ടെത്താന്‍ കഴിഞ്ഞ ദിവസമാണു പൊലീസ് ലുക്കൗട്ട് നോട്ടിസിറക്കിയത്. ഷാജഹാന്‍ ഉള്‍പ്പെടെ അഞ്ചുപേരെയാണ് സഞ്ജിത്ത് വധക്കേസില്‍ ഇതുവരെ പിടികൂടിയത്.