ഡെല്‍റ്റയില്‍നിന്നും വ്യത്യസ്തം, ഒമിക്രോണ്‍ ആണോയെന്ന് പറയാനാകില്ല; സാംപിള്‍ അയച്ചു

ദക്ഷിണാഫ്രിക്കയില്‍നിന്ന് അടുത്തിടെ ബെംഗളൂരുവിലെത്തിയ രണ്ടു പേരില്‍ ഒരാളുടെ സാംപിള്‍ ഡെല്‍റ്റ വകഭേദത്തില്‍നിന്നു വ്യത്യസ്തമാണെന്ന് കര്‍ണാടക ആരോഗ്യമന്ത്രി ഡോ. കെ.സുധാകര്‍ അറിയിച്ചു. ഇക്കാര്യത്തില്‍ കേന്ദ്ര ആരോഗ്യ മന്ത്രാലയവുമായും ഇന്ത്യന്‍ കൗണ്‍സില്‍ ഫോര്‍ മെഡിക്കല്‍ റിസര്‍ച് (ഐസിഎംആര്‍) അധികൃതരുമായും ബന്ധപ്പെട്ടിരിക്കുന്നതിനാല്‍ ഒമിക്രോണ്‍ ആണോയെന്ന് ഔദ്യോഗികമായി പറയാന്‍ കഴിയില്ലെന്നു മന്ത്രി പറഞ്ഞു. സാംപിള്‍ ഐസിഎംആറിന് അയച്ചിട്ടുണ്ടെന്നും അദ്ദേഹം പറഞ്ഞു. 63 വയസ്സുള്ളയാളുടെ സാംപിളാണു പരിശോധയ്ക്ക് അയച്ചത്. ഇയാളുടെ വ്യക്തിവിരങ്ങള്‍ പുറത്തുവിട്ടിട്ടില്ല. മുന്‍കരുതലിനായി സ്വീകരിക്കേണ്ട നടപടികളെക്കുറിച്ച് ചൊവ്വാഴ്ച, വകുപ്പിലെ ഉദ്യോഗസ്ഥരുമായും പ്രിന്‍സിപ്പല്‍ സെക്രട്ടറി മുതല്‍ പ്രാഥമികാരോഗ്യ കേന്ദ്ര തലത്തിലുള്ള ഡോക്ടര്‍മാരോടു വരെയും മാരത്തണ്‍ യോഗത്തില്‍ അധ്യക്ഷത വഹിക്കുമെന്നും മന്ത്രി അറിയിച്ചു. കോവിഡ് സംബന്ധിച്ച സാങ്കേതിക ഉപദേശക സമിതി അംഗങ്ങളെയും യോഗത്തിലേക്കു ക്ഷണിച്ചിട്ടുണ്ട്. ഒമിക്രോണ്‍ വകഭേദത്തെക്കുറിച്ച് വിശദമായ റിപ്പോര്‍ട്ട് ആവശ്യപ്പെട്ടിട്ടുണ്ടെന്നും മന്ത്രി പറഞ്ഞു. കഴിഞ്ഞ 14 ദിവസത്തിനുള്ളില്‍ ദക്ഷിണാഫ്രിക്കയില്‍നിന്ന് വന്ന എല്ലാ യാത്രക്കാരെയും നിരീക്ഷിക്കുന്നു. ശനിയാഴ്ച മുതല്‍ അവരുടെ പ്രാഥമിക, ദ്വിതീയ സമ്പര്‍ക്കത്തിലുള്ളവരെ കണ്ടെത്താനും പരിശോധിക്കാനും തുടങ്ങി. ലോക്ഡൗണിന്റെ സാധ്യതയെക്കുറിച്ചുള്ള മാധ്യമങ്ങളുടെ ചോദ്യത്തിന്, സര്‍ക്കാരിനു മുന്‍പില്‍ അത്തരമൊരു നിര്‍ദേശം ഇല്ലെന്നു മന്ത്രി പറഞ്ഞു.