ദേശീയ ദിനം ആഘോഷമാക്കാന്‍ ഒരുങ്ങി യുഎഇ

സുവര്‍ണജൂബിലി ദേശീയ ദിനം ആഘോഷമാക്കാന്‍ ഒരുങ്ങി യുഎഇ. പ്രത്യേക പരിപാടികളും കരിമരുന്ന് പ്രയോഗവും വിലക്കിഴിവ് വില്‍പനയുമൊക്കെയായി ആഘോഷത്തിന്റെ ആവേശത്തിലാണ് രാജ്യം. ഡിസംബര്‍ ഒന്ന് മുതല്‍ പൊതുഅവധി പ്രഖ്യാപിച്ച് ആഘോഷത്തിന് മാറ്റുകൂട്ടൂം. വിവിധ പ്രവാസി കൂട്ടായ്മകളും യുഎഇ സുവര്‍ണ ജൂബിലി ആഘോഷത്തിനുളള തയ്യാറെടുപ്പിലാണ്. വിവിധ വാണിജ്യ- വ്യാപാര സ്ഥാപനങ്ങള്‍ വിലക്കിഴിവും ഓഫറുകളുമെല്ലാം നേരത്തെ തന്നെ പ്രഖ്യാപിച്ചിട്ടുണ്ട്. ഡിസംബര്‍ രണ്ടു മുതല്‍ പതിനൊന്ന് വരെ നീണ്ടുനില്‍ക്കുന്ന പരിപാടികളാണ് ദുബായ് ഫെസ്റ്റിവല്‍സ് ആന്റ് റീടെയ്‌ലല്‍ എസ്റ്റാബ്ലിഷ്‌മെന്റ് സംഘടിപ്പിച്ചിരിക്കുന്നത്. കരിമരുന്ന് പ്രയോഗമുള്‍പ്പടെയുളള ആഘോഷപരിപാടികളും ഈ ദിവസങ്ങളില്‍ യുഎഇയുടെ ആകാശത്തിന് ചന്തം ചാര്‍ത്തും. ജുമൈറ ബീച്ച് എത്തിസലാത്ത് ബീച്ച് കാന്റീന്‍, ലാമെര്‍ ബുര്‍ജ് അല്‍ അറബ്, ബ്ലൂവാട്ടേഴ്‌സ്, ദ പാം, അത്‌ലാന്റിസ് ദ പോയിന്റെ എന്നിവിടങ്ങളിലെല്ലാം കരിമരുന്ന് ആസ്വദിക്കാനാവും. രാത്രി 8 മണിക്കും, 8.30 നും 9 നുമായാണ് കരിമരുന്ന് പ്രയോഗമുണ്ടാവുക. മാജിദ് അല്‍ ഫുത്തൈം മാളുകള്‍, ദുബായ് ഫെസ്റ്റിവല്‍ സിറ്റി മാള്‍, ദുബായ് മാള്‍, ദുബായ് ഔട്ട് ലെറ്റ് മാള്‍ എന്നിവിടങ്ങളിലെല്ലാം 50 മുതല്‍ 70 ശതമാനം വരെ വിലക്കിഴിവുണ്ടാകും. ഡിസംബര്‍ 13 വരെയാണ് ഈ ഇളവുകള്‍ പ്രഖ്യാപിച്ചിട്ടുളളത്.