സമരക്കാരുമായുള്ള ചര്‍ച്ച സര്‍ക്കാര്‍ തീരുമാനിക്കുമെന്ന് എം.വി. ഗോവിന്ദന്‍

പ്രതിഷേധം കണ്ട് ഭയന്നിട്ടില്ലെന്ന് എം.എം. മണി

കോട്ടയം: പിഎസ് സി റാങ്ക് പട്ടികയില്‍ ഉള്‍പ്പെട്ട ഉദ്യോഗാര്‍ത്ഥികളുടെ പ്രതിഷേധത്തോട് പ്രതികരിച്ച് സിപിഎം കേന്ദ്രകമ്മിറ്റി അംഗം എം വി ഗോവിന്ദനും മന്ത്രി എംഎം മണിയും. റാങ്ക് പട്ടികയിലുള്‍പ്പെട്ടവരുടെ സമരത്തില്‍ നുഴഞ്ഞുകയറി സംസ്ഥാനത്ത് കലാപം ഉണ്ടാക്കാനാണ് കോണ്‍ഗ്രസിന്റെയും യൂത്ത് കോണ്‍ഗ്രസിന്റെയും ശ്രമമെന്ന് സിപിഎം കേന്ദ്രകമ്മിറ്റി അംഗം എം വി ഗോവിന്ദന്‍ മാസ്റ്റര്‍ ആരോപിച്ചു.
ലിസ്റ്റില്‍ ഉള്ള എല്ലാവര്‍ക്കും ജോലി കൊടുക്കാനാവില്ലെന്ന് എല്ലാവര്‍ക്കും അറിയാം. നാമ മാത്രമായ ആളുകളെയാണ് എല്‍ഡിഎഫ് സര്‍ക്കാര്‍ സ്ഥിരപ്പെടുത്തിയത്. സമരക്കാരുമായുള്ള ചര്‍ച്ച സംബന്ധിച്ചും സര്‍ക്കാര്‍ ഉചിതമായ തീരുമാനം എടുക്കുമെന്നും ഗോവിന്ദന്‍ മാസ്റ്റര്‍ പ്രതികരിച്ചു.
അതേ സമയം താല്‍ക്കാലിക ജീവനക്കാരെ സ്ഥിരപ്പെടുത്താനുള്ള തീരുമാനത്തില്‍ നിന്നും സര്‍ക്കാര്‍ പിന്നോട്ട് പോയത് പ്രതിഷേധങ്ങള്‍ കണ്ട് ഭയന്നല്ലെന്ന് മന്ത്രി എംഎം മണി പ്രതികരിച്ചു. അര്‍ഹതപ്പെട്ടവരുടെ ജോലി നഷ്ടപ്പെടുത്തിയത് പ്രതിപക്ഷമാണ്. കഴിഞ്ഞ ഉമ്മന്‍ ചാണ്ടി സര്‍ക്കാരാണ്. ഉദ്യോഗാര്‍ത്ഥികളുടെ കുടുംബങ്ങളുടെ കണ്ണീരിന് മറുപടി പറയണം. വേറെ പണി ഇല്ലാത്തതിനാലാണ് ഷാഫി പറമ്പിലും, ശബരിനാഥനും സമരം ചെയുന്നതെന്നും എംഎം മണി പരിഹസിച്ചു. പാലാ എംഎല്‍എ മാണി സി കാപ്പന്‍ ചെന്നിത്തലയുമായി രണ്ട് മാസം മുന്‍പേ ധാരണയുണ്ടാക്കിയെന്നും 'ശല്യം' ഒഴിഞ്ഞത് നന്നായെന്നും മുന്നണിക്ക് ഗുണം ചെയ്‌തെന്നും എംഎം മണി കൂട്ടിച്ചേര്‍ത്തു