അലയടിച്ച കര്‍ഷകരോഷം, പഞ്ചാബ് തൂത്തുവാരി കോണ്‍ഗ്രസ്

ബിജെപിക്ക് വന്‍ തിരിച്ചടി

പഞ്ചാബ് തദ്ദേശഭരണതെരഞ്ഞെടുപ്പിന്റെ ആദ്യഘട്ടഫലസൂചനകള്‍ പുറത്തുവരുമ്പോള്‍, ബിജെപിക്ക് വന്‍തിരിച്ചടി. കോണ്‍ഗ്രസാണ് ആദ്യഫലങ്ങള്‍ പുറത്തുവരുമ്പോള്‍ മുന്നിട്ടുനില്‍ക്കുന്നത്. രണ്ടാം സ്ഥാനത്ത് ശിരോമണി അകാലിദളാണ്. ഏറ്റവുമൊടുവില്‍ റിപ്പോര്‍ട്ടുകള്‍ പുറത്തുവരുമ്പോള്‍ മൂന്ന് മുന്‍സിപ്പല്‍ കോര്‍പ്പറേഷനുകളില്‍ കോണ്‍ഗ്രസ് വിജയമുറപ്പിച്ചുകഴിഞ്ഞു. നാലെണ്ണത്തില്‍ മുന്നിട്ട് നില്‍ക്കുന്നു. മൊഹാലി കോര്‍പ്പറേഷനിലെ ഫലം പ്രഖ്യാപിക്കുന്നത് നാളേയ്ക്ക് മാറ്റിയിട്ടുണ്ട്. അങ്ങനെ എട്ടില്‍ ഏഴ് കോര്‍പ്പറേഷനുകളിലും കോണ്‍ഗ്രസ് മുന്നിട്ടുനില്‍ക്കുകയാണ്.
എട്ട് മുന്‍സിപ്പല്‍ കോര്‍പ്പറേഷനുകളിലെ 2302 വാര്‍ഡുകളിലേക്കും, 109 മുന്‍സിപ്പല്‍ കൌണ്‍സില്‍ നഗര്‍ പഞ്ചായത്തുകളിലേക്കുമാണ് തെരഞ്ഞെടുപ്പ് നടന്നത്. ഈ തെരഞ്ഞെടുപ്പ് ഭരണകക്ഷിയായ കോണ്‍ഗ്രസിനും, ആം ആദ്മി പാര്‍ട്ടി, ശിരോമണി അകാലി ദള്‍ എന്നീ പാര്‍ട്ടികള്‍ക്കും നിര്‍ണായകമാണെങ്കിലും, അഗ്‌നിപരീക്ഷ ബിജെപിക്കാണ്. കര്‍ഷകനിയമങ്ങള്‍ക്കെതിരെ പ്രക്ഷോഭം അലയടിക്കുന്ന പഞ്ചാബില്‍, നിയമങ്ങള്‍ പാസ്സാക്കിയ ശേഷം നടക്കുന്ന ആദ്യതെരഞ്ഞെടുപ്പില്‍ ജനരോഷം വ്യക്തമാണ്.
71.39 ശതമാനം പോളിംഗ് രേഖപ്പെടുത്തിയ തെരഞ്ഞെടുപ്പില്‍ തീര്‍ച്ചയായും ബിജെപി അനുകൂലതരംഗമല്ല കാണുന്നതെന്ന് വ്യക്തമാണ്. ശിരോമണി അകാലിദള്‍ കേന്ദ്രമന്ത്രിസഭയില്‍ നിന്ന് രാജിവച്ചതിന് ശേഷം നടക്കുന്ന ആദ്യ തെരഞ്ഞെടുപ്പ് കര്‍ഷകനിയമങ്ങളുടെ റഫറന്‍ഡമായിരിക്കുമെന്ന് നേരത്തേ പ്രതിപക്ഷപാര്‍ട്ടികള്‍ പ്രഖ്യാപിച്ചിരുന്നതുമാണ്.
മിക്ക മുന്‍സിപ്പല്‍ കോര്‍പ്പറേഷനുകളിലും വാര്‍ഡുകളിലും മുന്നില്‍ നില്‍ക്കുന്നത് കോണ്‍ഗ്രസാണ്. മുന്‍ ബിജെപി മന്ത്രി ത്രിക്ഷന്‍ സൂദിന്റെ ഭാര്യ ഹോഷിയാര്‍പൂരില്‍ നിന്ന് തോറ്റു. അമൃത്സറില്‍ മുന്നില്‍ നില്‍ക്കുന്നത് കോണ്‍ഗ്രസാണ്. ശിരോമണി അകാലിദള്‍ രണ്ടാംസ്ഥാനത്താണ്. ഫാസില്‍ക, ജാഗ്രാവ്, അബോഹര്‍, മോഗ എന്നിവിടങ്ങളിലും കോണ്‍ഗ്രസ് മുന്നില്‍ നില്‍ക്കുന്നു. മൊഹാലി കോര്‍പ്പറേഷനിലെ തെരഞ്ഞെടുപ്പ് ഫലം പ്രഖ്യാപിക്കുന്നത് നാളേയ്ക്ക് മാറ്റി. അവിടെ ചില വാര്‍ഡുകളില്‍ റീപോളിംഗ് വേണ്ടി വന്നതിനാലാണ് ഫലപ്രഖ്യാപനം മാറ്റിയത്.
കോണ്‍ഗ്രസ് വന്‍ അക്രമമാണ് പലയിടത്തും അഴിച്ചുവിട്ടതെന്നും, ബൂത്ത് പിടിച്ചെടുക്കലടക്കം നടത്തിയെന്നും, ബിജെപി തെരഞ്ഞെടുപ്പ് ദിവസം തന്നെ ആരോപിച്ചിരുന്നു. എന്നാല്‍ കോണ്‍ഗ്രസ് ഇതിനെതിരെ രൂക്ഷവിമര്‍ശനവുമായി രംഗത്തെത്തുന്നു. കര്‍ഷകനിയമങ്ങള്‍ക്കെതിരെ പഞ്ചാബിലെ ജനം വിധിയെഴുതുന്ന തെരഞ്ഞെടുപ്പാകും ഇതെന്നും പഞ്ചാബ് മുഖ്യമന്ത്രി ക്യാപ്റ്റന്‍ അമരീന്ദര്‍ സിംഗ് വ്യക്തമാക്കിയിരുന്നു.