വരുമാനമില്ല , സർക്കാർ സഹായം തേടി ക്ഷേത്രങ്ങൾ

ശബരിമലയെ ചൊല്ലി രാഷ്ട്രീയ വിവാദം കത്തുമ്പോൾ കേരളത്തിലെ ക്ഷേത്രങ്ങളും അവിടുത്തെ ജീവനക്കാരും കടന്നു പോകുന്നത് കടുത്ത പ്രതിസന്ധിയിലൂടെ.

100 കോടി രൂപ അടിയന്തരമായി കിട്ടിയില്ലെങ്കിൽ ഒരു ദിവസം പോലും മുന്നോട്ടുപോകാൻ ബോർഡിനു കഴിയില്ല. അയ്യായിരത്തോളം ജീവനക്കാർക്ക് ശമ്പളം നൽകാനും നിവൃത്തിയില്ല. 1250 ക്ഷേത്രങ്ങളിലെ കാര്യങ്ങൾ നടക്കില്ല എന്നതാണ് അവസ്ഥ.

കൊവിഡാണ് ബോർഡിനു വീണ്ടും തിരിച്ചടിയായത്. ശബരിമല ക്ഷേത്രത്തിലെ വരുമാനം കൊണ്ടു മാത്രം കാര്യങ്ങൾ നടന്നുപോകുന്ന 1250 ക്ഷേത്രങ്ങളാണ് ബോർഡിനു കീഴിലുള്ളത്. ക്ഷേത്രങ്ങളിൽ ഭക്തർക്കു പ്രവേശനം കേന്ദ്രമാനദണ്ഡം അനുസരിച്ച് വിലക്കിയതോടെ, അവിടെയൊക്കെ പൂജ അടക്കം അത്യാവശ്യകാര്യങ്ങൾക്കുള്ള വരുമാനം പോലും ഇല്ലാതായി. ശബരിമലയിൽനിന്ന് 21 കോടി വരുമാനം ലഭിച്ചപ്പോൾ 69 കോടി ചെലവും വന്നു. അതിനാൽ മറ്റ് അമ്പലങ്ങളിലേക്ക് ഒന്നും കൊടുക്കാൻപറ്റാത്ത സ്ഥിതിയായി.
70 കോടിയോളം രൂപയാണ് പ്രതിസന്ധി ഘട്ടത്തിൽ ദേവസ്വം ബോർഡിനു സർക്കാർ കൈമാറിയത്. അത് കൂടാതെയാണ് 100 കോടി രൂപയുടെ സഹായം വീണ്ടും തേടിയിരിക്കുന്നത്. ശബരിമല വിവാദം ഒരു ഘട്ടത്തിലും ബോർഡിനെ വലച്ചിട്ടില്ലന്ന് കണക്കുകൾ പറയുന്നു.
വിവാദം കത്തിനിന്ന സമയത്ത് നൂറ് കോടിയുടെ വരുമാനം കുറഞ്ഞെങ്കിലും തൊട്ടടുത്ത മാസങ്ങളിൽ അത് തിരികെ എത്തുകയായിരുന്നു.