തുടർച്ചയായി മൽസരിക്കുന്നവർക്ക് സി പി ഐ യിലും സീറ്റില്ല

തുടർച്ചയായിനിയമസഭയിലേക്ക മൽസരിക്കുന്നവരെ ഒഴിവാക്കാനുള്ള സി പി എം തീരുമാനത്തിനു പിന്നാലെ സി പി ഐ യിലും പുതുമുഖങ്ങൾക്ക് അവസം നൽകുന്ന രീതിയിൽ മാറ്റം വരുന്നു.
നിയമസഭാ തിരഞ്ഞെടുപ്പിൽ തുടർച്ചയായി 3 തവണ ജയിച്ചവർക്കു വീണ്ടും മത്സരിക്കാൻ സിപിഐ ഇത്തവണ ഇളവു നൽകില്ല. ഇതോടെ മന്ത്രിമാരായ പി.തിലോത്തമൻ, വി.എസ്. സുനിൽ കുമാർ, കെ.രാജു സി.ദിവാകരൻ, മുല്ലക്കര രത്‌നാകരൻ, ഇ.എസ്. ബിജിമോൾ എന്നിവർക്കു മാറി നിൽക്കേണ്ടിവരും.

തുടർച്ചയായി പരമാവധി 2 ടേം എന്നതാണു സ്ഥാനാർഥിത്വം സംബന്ധിച്ചു സിപിഐയുടെ നിബന്ധന. കഴിഞ്ഞ തവണ ജില്ലാ നേതൃത്വങ്ങളുടെ അഭ്യർഥന കണക്കിലെടുത്താണ് ഇവർക്കു മൂന്നാം ഊഴത്തിനായി ഇളവു നൽകിയത്.
ഇളവു വേണ്ടെന്നാണു നേതൃതലത്തിൽ ഇപ്പോഴുള്ള ധാരണ. സിപിഐ ദേശീയ നിർവാഹക, കൗൺസിൽ യോഗങ്ങൾ ഹൈദരാബാദിൽ ചേർന്ന ഘട്ടത്തിൽ കേന്ദ്ര നേതൃത്വത്തിന്റെ അംഗീകാരവും ഇക്കാര്യത്തിൽ തേടി.

രണ്ടു ടേം കഴിഞ്ഞവരെയും മാറ്റണമെന്ന അഭിപ്രായത്തിനാണു നേതൃത്വത്തിൽ മുൻതൂക്കം. മന്ത്രി ഇ. ചന്ദ്രശേഖരൻ, ഡപ്യൂട്ടി സ്പീക്കർ വി.ശശി, ഇ.കെ. വിജയൻ, ചിറ്റയം ഗോപകുമാർ, ഗീതാ ഗോപി, ജി.എസ്. ജയലാൽ എന്നിവർ രണ്ടും ടേം പൂർത്തിയാക്കി. അതതു മണ്ഡലങ്ങളിൽ ഇവരുടെ സാന്നിധ്യം വിജയത്തിന് അനിവാര്യമാണെന്നു പറഞ്ഞ് ജില്ലാ നേതൃത്വം ആവശ്യപ്പെട്ടാൽ മാത്രം മൂന്നാം ടേം ചിലർക്ക് ലഭിക്കും.