വയനാടില്‍ ആദിവാസി സ്ത്രീ ശോഭയുടെ മരണം അന്വേഷണം ക്രൈം ബ്രാഞ്ചിന് കൈമാറി

മാനന്തവാടി: വയനാടില്‍ ആദിവാസി സ്ത്രീ ശോഭയുടെ മരണം അന്വേഷണം ക്രൈം ബ്രാഞ്ചിന് കൈമാറി. കുറുക്കന്‍മൂല കോളനിയിലാണ് സംഭവം നടന്നത്. ശോഭയുടെ അമ്മയുടെ പരാതി പ്രകാരമാണ് നടപടി.
ശോഭയുടെ മരണത്തില്‍ ദുരൂഹത ഉണ്ടെന്നും, കൂടുതല്‍ അന്വേഷണം ആവശ്യമാണെന്നും കാണിച്ച് ശോഭയുടെ അമ്മ ജില്ലാ പൊലീസ് മേധാവിക്ക് പരാതി നല്‍കിയിരുന്നു.

അന്വേഷണം നടന്നുവരവേ ചില സംഘടനയില്‍ പെട്ട ആളുകള്‍ ശോഭയുടെ കേസ് നടത്തിപ്പിന്റെ ആവശ്യത്തിലേക്കായി പണ പിരിവ് നടത്തുന്നതായി പൊലീസ് അറിയിച്ചു. ഇത്തരത്തില്‍ പണപ്പിരിവ് നടത്താന്‍ കോളനി നിവാസികളെ ഉപയോഗിക്കുന്നതായും പരാതി ലഭിച്ചിട്ടുണ്ട്. ഇത്തരത്തില്‍ പണപ്പിരിവ് നടത്തി മാവോയിസ്റ്റ് പോലുള്ള നിരോധിക്കപ്പെട്ട സംഘടനകള്‍ക്ക് പണം എത്തിച്ച് കൊടുക്കുന്നതായും നാട്ടുകാര്‍ സംശയിക്കുന്നുണ്ട്. മാവോയിസ്റ്റ് സംഘടനകളുമായി അടുത്ത ബന്ധം പുലര്‍ത്തുന്ന ചില സംഘടനകളാണ് നാട്ടുകാരില്‍ നിന്നും കച്ചവട സ്ഥാപനങ്ങളില്‍ നിന്നും നിര്‍ബന്ധപൂര്‍വ്വം പണപ്പിരിവ് നടത്തുന്നത്.

കഴിഞ്ഞ ദിവസം ഇത്തരത്തില്‍ പണപ്പിരിവ് നടത്തുന്നതായി പരാതി ലഭിച്ചിരുന്നു. മാനന്തവാടി പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.പോരാട്ടം സംഘടനയുടെ ഷാന്റോ ലാലിന് എതിരെയാണ് പരാതി. ഇത്തരത്തിലുള്ള പണപ്പിരിവുകള്‍ ശ്രദ്ധയില്‍പ്പെട്ടാല്‍ ഉടന്‍ പൊലീസില്‍ അറിയിക്കണമെന്ന് പൊലീസ് അറിയിച്ചു.