ബിഹാറിൽ യുവാവിനെ തല്ലിക്കൊന്നു

പട്‌ന: ബിഹാറിൽ യുവാവിനെ ജനക്കൂട്ടം തല്ലിക്കൊന്നു. കന്നുകാലികളെ മോഷ്ടിക്കാൻ ശ്രമിച്ചുവെന്നാരോപിച്ചാണ് ജനങ്ങൾ ക്രൂരമായി ഇയാളെ തല്ലിക്കൊന്നത്. 36 കാരനായ ശ്യമാനന്ദ് യാദവ് എന്ന യുവാവാണ് മരിച്ചതെന്ന് ടൈംസ് ഓഫ് ഇന്ത്യയുടെ റിപോർട്ടിൽ വ്യക്തമാക്കുന്നു. കൂടെയുണ്ടായിരുന്ന രണ്ട് പേർക്ക് ക്രൂരമായി മർദ്ദനമേൽക്കുകയും ചെയ്തു. പൂർണിയ ജില്ലയിലെ കൃത്യാനന്ദ് പോലിസ് സ്റ്റേഷൻ പരിധിയിലുള്ള കാഡ്ഗാമ ഗ്രാമത്തിൽ ഇന്നലെയാണ് ആക്രമസംഭവങ്ങൾ നടന്നത്.
മർദേനമേറ്റവരിൽ ഒരാളുടെ കണ്ണിന് ഗുരുതര പരിക്കേറ്റു.

കാഴ്ചശക്തി നഷ്ടപ്പെടുമെന്നും ഡോക്റർമാർ പറഞ്ഞു. 40 കാരനായ മനോജ് യാദവ്, 25 കാരനായ കൈലാഷ് സാഹ എന്നിവർക്കാണ് ഗുരുതരമായി പരിക്കേറ്റത്. രണ്ടുപേരും സർദാർ ആശുപത്രിയിൽ ചികിത്സയിലാണ്. ശ്രീനഗറിലെ ദേവിനഗർ ഗ്രാമത്തിൽ താമസിക്കുന്നയാളാണ് മനോജ്. മരിച്ചയാളും പരിക്കേറ്റ മറ്റ് ആളുകളും അരാരിയ ജില്ലയിലെ റാണിഗഞ്ച് പോലീസ് സ്റ്റേഷന് കീഴിലുള്ള കോസ്‌കാപൂർ ഗ്രാമത്തിൽ നിന്നുള്ളവരാണ്. സംഭവ സ്ഥലത്ത് വെച്ച് തന്നെ ശ്യാമാനന്ദ് മരിച്ചു. മരിച്ച നിലയിലാണ് ഇദ്ദേഹത്തെ ആശുപത്രിയിൽ എത്തിച്ചത്. പോസ്റ്റ് മോർച്ച് പൂർത്തിയാക്കിയ ശേഷം മൃതദേഹം കുടുംബത്തിന് കൈമാറും.