മലപ്പുറത്ത് വീട്ടില്‍ വന്‍ കവര്‍ച്ച

മലപ്പുറം: മലപ്പുറം എടപ്പാള്‍ ചേകന്നൂരിലെ വീട്ടില്‍ വന്‍ കവര്‍ച്ച നടത്തി. അലമാരയില്‍ സൂക്ഷിച്ച 125 പവന്‍ സ്വര്‍ണാഭരങ്ങളും അറുപത്തി അയ്യായിരം രൂപയുമാണ് മോഷണം പോയത്. ചേകന്നൂര്‍ പുത്തംകുളം മുതുമുറ്റത്ത് മുഹമ്മദ് കുട്ടിയുടെ വീട്ടിലാണ് മോഷണം നടന്നത്. പൊന്നാനി പൊലീസ് സ്ഥലത്തെത്തി അന്വേഷണം ആരംഭിച്ചു. വ്യാഴാഴ്ച്ച സംഭവം നടന്നത്. രാവിലെ 11 മണിയോടെ ബന്ധു വീട്ടിലേക്ക് പോയ കുടുംബം രാത്രി ഒമ്പത് മണിക്ക് തിരികെ എത്തിയപ്പോഴാണ് മോഷണ വിവരം ശ്രദ്ധയില്‍പ്പെട്ടത്.

താഴത്തെ നിലയിലെ മുറിയുടെ അലമാരയുടെ വാതില്‍ തുറന്ന് കിടക്കുന്നത് കണ്ട വീട്ടുകാര്‍ നടത്തിയ പരിശോധനയിലാണ് സ്വര്‍ണം മോഷണം പോയെന്ന് മനസിലായത്. ഇതോടൊപ്പം ഉണ്ടായിരുന്ന 65,000 രൂപയും കാണാതായിട്ടുണ്ട്.ദിവസങ്ങള്‍ക്ക് മുന്‍പാണ് മുഹമ്മദ് കുട്ടിയുടെ മകന്റെ വിവാഹം നടന്നത്. കുടുംബത്തെ നന്നായി അറിയാവുന്നവരാണ് മോഷണത്തിന് പിന്നിലെന്ന് വീട്ടുകാര്‍ സംശയിക്കുന്നു. വാതിലുകള്‍ തുറക്കാതെ, അലമാരയുടെ പൂട്ട് പൊളിക്കാതെ നടന്ന മോഷണം ദുരൂഹത വര്‍ധിപ്പിക്കുന്നു.

തിരൂര്‍ ഡിവൈഎസ്പി സുരേഷ് ബാബുവിന്റെ നേതൃത്വത്തില്‍ പൊലീസും വിരലടയാള വിദഗ്ധരും വീട്ടിലും പരിസരത്തും വിശദമായ പരിശോധന നടത്തി. സമീപ പ്രദേശങ്ങളിലെ സിസിടിവി ദൃശ്യങ്ങളും പൊലീസ് ശേഖരിച്ചു വരുകയാണ്.