മഞ്ചേരിയില്‍ മുസ്ലിംലീഗിന് തിരിച്ചടിയായത് വിമതര്‍

നഗരസഭാ തെരഞ്ഞെടുപ്പില്‍ 34 സീറ്റുകളില്‍ മത്സരിച്ച ലീഗിന് നഷ്ടമായത് ആറ് സീറ്റുകള്‍, പല വാര്‍ഡുകളിലും ഗണ്യമായ വോട്ടു ചോര്‍ച്ചയാണുണ്ടായത്. ഒന്നാം വാര്‍ഡില്‍ 2015ല്‍ ലീഗിന് ലഭിച്ച 547 ഭൂരിപക്ഷം ഇത്തവണ 145 ആയി ചുരുങ്ങി. പല വാര്‍ഡുകളിലും വില്ലനായെത്തിയത് വിമതരായിരുന്നു. മഞ്ചേരി 38 വാക്കെതൊടിയില്‍ വിമത സ്ഥാനാര്‍ത്ഥി നേടിയത് 757 വോട്ടുകള്‍. 2015ല്‍ 571 വോട്ട് ഭൂരിപക്ഷത്തില്‍ ജയിച്ച മുസ്ലിം ലീഗിന് ഇത്തവണ കിട്ടിയത് 86 വോട്ടിന്റെ ഭൂരിപക്ഷം മാത്രം. 36 ഉള്ളാടംകുന്ന് സീറ്റ് സംബന്ധിച്ചും സ്ഥാനാര്‍ഥി നിര്‍ണ്ണയ ചര്‍ച്ചയില്‍ തര്‍ക്കമുയര്‍ന്നിരുന്നു. നേതൃത്വത്തിന്റെ കടുംപിടുത്തം മൂലം മുസ്ലിംലീഗ് കുത്തകയായിരുന്ന വാര്‍ഡ് എസ്ഡിപിഐയുടെ കരങ്ങളിലെത്തിച്ചു. 2015ല്‍ ഉള്ളാടംകുന്നില്‍ മുസ്ലിംലീഗിന് 497 വോട്ടിന്റെ ഭൂരിപക്ഷമുണ്ടായിരുന്നു. മുസ്ലിം ലീഗ് വിമതശല്യം നേരിട്ട മറ്റൊരു വാര്‍ഡാണ് 22 നെല്ലിക്കുത്ത് എല്‍പിഎസ്. 273 വോട്ടിന്റെ ഭൂരിപക്ഷത്തില്‍ മുസ്ലിംലീഗിലെ അമീന സിദ്ദീഖ് 2015ല്‍ ജയിച്ച വാര്‍ഡില്‍ ഇത്തവണ സ്ഥാനാര്‍ത്ഥിയുടെ ഭര്‍ത്താവ് സിദ്ദീഖ് അവകാശം ഉന്നയിച്ചു. എന്നാല്‍ നേതൃത്വം ഇത് വകവെക്കാതെ മറ്റൊരു സ്ഥാനാര്‍ഥിയെ നിശ്ചയിച്ചു. ഇതോടെ സിദ്ദീഖ് വിമതനായി മത്സരിക്കുകയും വിജയിക്കുകയും ചെയ്തു. 39 തടത്തിപ്പറമ്പില്‍ മുസ്ലിം ലീഗ് പ്രവര്‍ത്തകരുടെ വര്‍ഷങ്ങളായുള്ള ആവശ്യം നിരാകരിച്ച് നേതൃത്വം സീറ്റ് കോണ്‍ഗ്രസ്സിന് നല്‍കിയത് ഗുണമായത് ഐ എന്‍ എല്‍ സ്ഥാനാര്‍ത്ഥിക്ക്. 46 വീമ്പൂരില്‍ മുസ്ലിം ലീഗ് നേതാവും മുന്‍നഗരസഭാദ്ധ്യക്ഷനുമായ കുറ്റിക്കാടന്‍ കുഞ്ഞിമുഹമ്മദ് ഹാജി നേതൃത്വത്തോട് ഇടയുകയും മകളെ സ്ഥാനാര്‍ത്ഥിയായി നിര്‍ത്തുകയും ചെയ്തു. ഇതോടെ കഴിഞ്ഞ തവണ ലീഗീന് ലഭിച്ച 218 വോട്ടിന്റെ ഭൂരിപക്ഷം ഇത്തവണ 91 ആയി കുറഞ്ഞു. 50 രാമംകുളം വാര്‍ഡിലും ഇത്തവണ വലിയ വോട്ടു ചോര്‍ച്ചയാണ് ഉണ്ടായത്. 582 വോട്ടിന്റെ ഭൂരിപക്ഷം നേടിയാണ് മുസ്ലിംലീഗിലെ അത്തിമണ്ണില്‍ സജ്ന ഇവിടെ നിന്നും 2015ല്‍ ജയിച്ചു കയറിയത്. എന്നാല്‍ ഇത്തവണ മുസ്ലിംലീഗ് 50 വോട്ടിന് ഇവിടെ എല്‍ഡിഎഫിനോട് പരാജയം ഏറ്റുവാങ്ങുകയായിരുന്നു. ചെട്ടിയങ്ങാടി, പുന്നക്കുഴി എന്നീ വാര്‍ഡുകളും ലീഗിന്റെ കൈയ്യില്‍ നിന്നും ഊര്‍ന്നുപോയി. ജമാഅത്തെ ഇസ്ലാമിയുമായുള്ള സഖ്യം മഞ്ചേരിയില്‍ ലീഗിന് കാര്യമായ നേട്ടമുണ്ടാക്കിയെന്ന് കരുതാനാവില്ല. ഇടതുകോട്ടകളെന്ന് വിശേഷിപ്പിക്കപ്പെടുന്ന രണ്ടു വാര്‍ഡുകളാണ് യുഡിഎഫ് നേതൃത്വം വെല്‍ഫെയര്‍ പാര്‍ട്ടിക്ക് മത്സരിക്കാനായി നല്‍കിയത്. ജയസാധ്യത ഇല്ലാത്ത ഒരു സീറ്റ് പോലും നല്‍കാത്തതില്‍ വെല്‍ഫെയര്‍ പാര്‍ട്ടി പ്രവര്‍ത്തകരില്‍ അതൃപ്തി ഉണ്ടാക്കിയിരുന്നു.