തദ്ദേശ തെരഞ്ഞെടുപ്പില്‍ മൂന്നു സഹോദരങ്ങള്‍ ഒന്നിച്ച് വിജയത്തേരില്‍

തൃശൂര്‍: സംസ്ഥാനത്തെ തദ്ദേശ തെരഞ്ഞെടുപ്പും വോട്ടെണ്ണലും കഴിഞ്ഞപ്പോള്‍ എല്‍.ഡി.എഫ് സ്ഥാനാര്‍ത്ഥികളായ മൂന്നു സഹോദരങ്ങള്‍ ഒന്നിച്ച് വിജയത്തേരില്‍ എത്തിയിരിക്കുന്നു. ചെത്തുതൊഴിലാളി യൂണിയന്‍ നേതാവായിരുന്ന വി എ നാരായണന്റെ മൂന്നുമക്കളാണ് ഇനി ഒന്നിച്ച് ഇക്കുറി ജനപ്രതിനിധികളാകുന്നത്. എല്‍ഡിഎഫ് സ്ഥാനാര്‍ഥികളായി നാലുമക്കള്‍ മത്സരിച്ചെങ്കിലും മൂന്നുപേരും വിജയിച്ചു. അതേസമയം ഒരാള്‍ ഒരുവോട്ടിനാണ് പരാജയപ്പെട്ടത്. നാലുപേരും അരിവാള്‍ ചുറ്റിക നക്ഷത്രത്തിലാണ് മത്സരിച്ചത്.

വി എന്‍ സുര്‍ജിത്ത്, സഹോദരിമാരായ മേനകമധു, രജനി തിലകന്‍, ഷീബ ചന്ദ്രബോസ് എന്നിവരാണ് മത്സരിച്ചത്. അന്തിക്കാട് ഡിവിഷനില്‍നിന്നും ജില്ലാ പഞ്ചായത്തിലേക്ക് മത്സരിച്ച വി എന്‍ സുര്‍ജിത്ത് എണ്ണായിരത്തില്‍പ്പരം വോട്ടിന്റെ ഭൂരിപക്ഷത്തിലാണ് വിജയിച്ചത്. സിപിഐ എം ഏരിയ കമ്മിറ്റിഅംഗമാണ്. നേരത്തേ മണലൂര്‍ പഞ്ചായത്ത് പ്രസിഡന്റും ഡിവൈഎഫ്ഐ സംസ്ഥാനകമ്മിറ്റി അംഗവുമായിരുന്നു.

മേനകമധു അന്തിക്കാട് പഞ്ചായത്ത് 12--ാം വാര്‍ഡില്‍ 328 വോട്ടിനാണ് വിജയിച്ചത്. മഹിളാ അസോസിയേഷന്‍ പഞ്ചായത്ത് പ്രസിഡന്റാണ്. രജനി തിലകന്‍ അന്തിക്കാട് ബ്ലോക്കിലെ ചാഴൂരിലാണ് മത്സരിച്ചത്. 2070 വോട്ടിന്റെ ഭൂരിപക്ഷത്തിലാണ് വിജയിച്ചത്. മഹിളാ അസോസിയേഷന്‍ പഞ്ചായത്ത് പ്രസിഡന്റാണ്. ആലപ്പാട് സര്‍വീസ് സഹകരണ ബാങ്ക് ഡയറക്ടറുമാണ്.

വാടാനപ്പള്ളി പഞ്ചായത്തില്‍ മൂന്നാംവാര്‍ഡില്‍ മത്സരിച്ച ഷീബ ചന്ദ്രബോസ് ഒരു വോട്ടിനാണ് പരാജയപ്പെട്ടത്.