പൊലീസിന് നേരെ അക്രമം; ആറ് ലീഗ് പ്രവര്‍ത്തകര്‍ അറസ്റ്റില്‍

തെരുവന്‍പറമ്പ് ചിയ്യൂരില്‍ പൊലീസിനെ അക്രമിച്ച കേസില്‍ 6 ലീഗ് പ്രവര്‍ത്തകരെ നാദാപുരം സിഐ എന്‍.സുനില്‍കുമാര്‍ അറസ്റ്റ് ചെയ്തു. വാണിയന്‍ വീട്ടില്‍ മുഹമ്മദ് ഷഫീഖ് (23), താഴെ കളമുള്ളതില്‍ മുഹമ്മദ് (30), താഴെ കുരിച്ചോട്ടില്‍ അബ്ദുള്‍ ലത്തീഫ് (33), കിഴക്കെ പറമ്പത്ത് കെ.പി റഹീസ് (27), കല്ലാച്ചി സ്വദേശി കുഞ്ഞിപറമ്പത്ത് ആഷിഖ് (23), പൂലോറത്ത് റാഷിദ് (28) എന്നിവരെയാണ് അറസ്റ്റ് ചെയ്തത്. ബംഗ്ലുരുവിലേക്ക് കടക്കുകയായിരുന്ന പ്രതികളെ നാദാപുരം പൊലീസിന് ലഭിച്ച രഹസ്യവിവരത്തെ തുടര്‍ന്ന് മാനന്തവാടിയില്‍ വച്ച് മാനന്തവാടി പൊലീസ് കസ്റ്റഡിയിലെടുക്കുകയായിരുന്നു. തുടര്‍ന്ന് നാദാപുരം പൊലീസ് എത്തി പ്രതികളെ കസ്റ്റഡിയിലെടുത്ത് അറസ്റ്റ് രേഖപ്പെടുത്തി. നാദാപുരം ഒന്നാം ക്‌ളാസ് മജിസ്‌ട്രേറ്റ് പ്രതികളെ റിമാന്റ് ചെയ്തു. അക്രമ സംഭവത്തില്‍ കോണ്‍ഗ്രസ് മണ്ഡലം പ്രസിഡണ്ടും തൂണേരി ബ്‌ളോക്ക് ഡിവിഷന്‍ സ്ഥാനാഥിയുമായ അഡ്വ കെ.എന്‍. രഘുനാഥ്, യൂത്ത് ലീഗ് മണ്ഡലം സെക്രട്ടറി ഹാരിസ് ഈന്തുള്ളതില്‍, കെ.ടി.കെ അശോകന്‍ ഉള്‍പ്പെടെയുള്ള നൂറ് പേര്‍ക്കെതിരെയാണ് പൊലീസ് കേസെടുത്തത്, സംഭവത്തിന്റെ വീഡിയോ ചിത്രങ്ങളില്‍ നിന്ന് 30 പേരെ തിരിച്ചറിഞ്ഞിട്ടുണ്ട്. വധശ്രമം, പൊതുമുതല്‍ നശിപ്പിക്കല്‍, പൊലീസിന്റെ കൃത്യനിര്‍വ്വഹണം തടസ്സപ്പെടുത്തല്‍ ഉള്‍പ്പെടെയുള്ള വകുപ്പുകള്‍ ചേര്‍ത്താണ് കേസ് രജിസ്റ്റര്‍ ചെയ്തത്.