ഉയര്‍ന്ന പോളിംഗ് ശതമാനം എല്‍ഡിഎഫിനുള്ള പിന്തുണയെന്ന് ജലീല്‍

തദ്ദേശ തെരഞ്ഞെടുപ്പില്‍ ദുരന്ത കാലത്ത് കേരളത്തിലെ ജനങ്ങള്‍ക്ക് പട്ടിണിയില്ലാതെ സംരക്ഷിച്ച സര്‍ക്കാരിനുള്ള പിന്തുണ ജനങ്ങള്‍ നല്‍കുമെന്ന് മന്ത്രി കെ.ടി. ജലീല്‍. ആരോപണങ്ങളെല്ലാം പച്ചക്കള്ളമാണെന്ന് തെളിഞ്ഞു കഴിഞ്ഞു. പ്രതിപക്ഷവും മാധ്യമങ്ങളും ആരോപിച്ചത് കള്ളമാണ് എന്നതിന്റെ തെളിവാണ് താന്‍. രാവിലെ അറസ്റ്റ് ഉച്ചക്ക് അറസ്റ്റ് , രാത്രി അറസ്റ്റ് എന്നിങ്ങനെയാണ് പറഞ്ഞിരുന്നത്. എന്നിട്ട് എന്തെങ്കിലും സംഭവിച്ചോ ? പറഞ്ഞതെല്ലാം പച്ചക്കള്ളമായത് കൊണ്ടാണ് താനിപ്പോഴും ജനങ്ങള്‍ക്ക് മുന്നില്‍ നില്‍ക്കുന്നതെന്നും കെ.ടി. ജലീല്‍ പറഞ്ഞു.ഇഡി അന്വേഷിച്ചിട്ടും തനിക്കെതിരെ ഒരു തെളിവും കിട്ടിയില്ല. യുഡിഎഫിന്റെ ആരോപണം അടിസ്ഥാനരഹിതമാണ്. സിഎം രവീന്ദ്രന്‍ കൊവിഡാനന്തര ചികിത്സയിലാണ്. അന്വേഷണ ഏജന്‍സിക്ക് മുന്നില്‍ ഒളിച്ച് കളിക്കുന്നതാണെന്ന ആരോപണം ശരിയല്ല. അസ്വസ്ഥത മാറിയാല്‍ അദ്ദേഹം ഇഡിക്ക് മുന്നില്‍ ഹാജരാകുമെന്നും മന്ത്രി പറഞ്ഞു. ഉയര്‍ന്ന പോളിംഗ് ശതമാനം എല്‍ഡിഎഫിനുള്ള പിന്തുണയാണ്. സാധാരണ വോട്ട് ചെയ്യാത്തവര്‍ പോലും സര്‍ക്കാരിന് പിന്തുണയുമായി രംഗത്തെത്തുന്നു. വെല്‍ഫെയര്‍ പാര്‍ട്ടിയുമായി ഉള്ള ബന്ധം ലീഗിന് വലിയ രാഷ്ട്രീയ നഷ്ടമുണ്ടാക്കും. സുന്നി വിഭാഗം ഈ ധാരണയ്ക്ക് എതിരാണ്. മുജാഹിദ് വിഭാഗവും ഈ സഖ്യം അനുകൂലിക്കില്ലെന്നും കെ.ടി ജലീല്‍ പറഞ്ഞു.