ജനറൽ വാർഡുകളിൽ കൂടുതൽ സ‌്ത്രീകളെ മത്സരിപ്പിച്ചത‌് എൽഡിഎഫ്‌

തദ്ദേശ തെരഞ്ഞെടുപ്പിൽ എൽഡിഎഫ്‌ ചരിത്രവിജയം നേടുമെന്ന്‌ സിപിഐ എം പൊളിറ്റ്‌ബ്യൂറോ അംഗം കോടിയേരി ബാലകൃഷ്‌ണൻ. 2015ൽ ലഭിച്ചതിനേക്കാൾ വോട്ടും സീറ്റും വർധിക്കും.

‘വികസനത്തിന‌് ഒരു വോട്ട‌്, മതനിരപേക്ഷതക്ക‌് ഒരു വോട്ട‌്’ എന്ന എൽഡിഎഫിന്റെ തെരഞ്ഞെടുപ്പ്‌ മുദ്രാവാക്യം ജനങ്ങൾ ഏറ്റെടുത്തു. സ‌്ത്രീകൾ ഇത്രയേറെ രംഗത്തിറങ്ങിയ മറ്റൊരു തെരഞ്ഞെടുപ്പില്ല. ജനറൽ വാർഡുകളിൽ ഏറ്റവും കൂടുതൽ സ‌്ത്രീകളെ മത്സരിപ്പിച്ചത‌് എൽഡിഎഫ‌ാണ‌്.
യുഡിഎഫിന്റെ രാഷ‌്ട്രീയ പാപ്പരത്തത്തിനെതിരെ മൂന്നാംഘട്ട തെരഞ്ഞെടുപ്പിലും വൻ ജനമുന്നേറ്റമുണ്ടാവും. കേന്ദ്രസർക്കാരിന്റെ ജനവിരുദ്ധ നയത്തിനും വർഗീയതയ്‌ക്കുമെതിരായ വിധിയെഴുത്തുകൂടിയാകുമിത്‌.

എൽഡിഎഫ‌് കൂടുതൽ ശക്തിപ്പെടുകയും ബഹുജനാടിത്തറ വിപുലപ്പെടുകയുംചെയ‌്ത തെരഞ്ഞെടുപ്പാണിത്‌. 2015ൽ യുഡിഎഫിനൊപ്പമുണ്ടായ എൽജെഡി, കേരളകോൺഗ്രസ‌്–എം-, ഡെമോക്രാറ്റിക‌് കേരള കോൺഗ്രസ‌് പാർടികളെല്ലാം ഇത്തവണ എൽഡിഎഫിനൊപ്പമാണ‌്. കനത്ത പരാജയം ഉറപ്പായപ്പോൾ യുഡിഎഫും ബിജെപിയും രാഷ്‌ട്രീയം പറയാതെ അപവാദപ്രചാരണത്തിലാണ്‌. മുഖ്യമന്ത്രിയെയും മന്ത്രിമാരെയും പാർടി നേതാക്കളെയും വ്യക്തിഹത്യനടത്തുകയാണ്‌. ഇതൊന്നും നാട്ടിൽ വിലപ്പോകില്ലെന്നും 16ന്‌ വോട്ടെണ്ണുമ്പോൾ അക്കാര്യം തെളിയുമെന്നും കോടിയേരി പറഞ്ഞു.