പ്രചരണത്തില്‍ ശ്രദ്ധേയമായി പത്മജ നമ്പ്യാര്‍

പ്രചരണത്തില്‍ ശ്രദ്ധേയമായി സ്ത്രീ സാന്നിധ്യം. ചൂണ്ടല്‍ പഞ്ചായത്തില്‍ ഇടതുമുന്നണി സ്ഥാനാര്‍ത്ഥികള്‍ക്കുവേണ്ടിയാണ് സംഗീത അധ്യാപിക കൂടിയായ പത്മജ നമ്പ്യാര്‍ അനൗണ്‍സറായി രംഗത്തിറങ്ങിയിട്ടുള്ളത്. സാംസ്‌കാരിക പ്രവര്‍ത്തനങ്ങളില്‍ സജീവമായിട്ടുള്ള പത്മജ, ആദ്യമായാണ് തെരഞ്ഞെടുപ്പില്‍ മൈക്ക് അനൗണ്‍സ്മെന്റിനായി രംഗത്തിറങ്ങിയിട്ടുള്ളത്. തിങ്കളാഴ്ച്ച രാവിലെ കേച്ചേരിയിലെ ഇടതുമുന്നണി തെരഞ്ഞെടുപ്പ് കമ്മിറ്റി ഓഫീസില്‍ നിന്നാണ് പത്മജയുടെ നേതൃത്വത്തിലുള്ള പ്രചരണ വാഹനം എല്‍ഡിഎഫ് സ്ഥാനാര്‍ത്ഥികള്‍ക്ക് വോട്ട് അഭ്യര്‍ത്ഥിച്ചുകൊണ്ട് പുറപ്പെട്ടത്. പാട്ടും, ഇടതു സര്‍ക്കാരിന്റെ ജനപക്ഷ വികസന പ്രവര്‍ത്തനങ്ങളും അക്കമിട്ട് നിരത്തി കൊണ്ട് പ്രചരണ രംഗത്ത് ആദ്യ ദിനം കൊണ്ട് തന്നെ തരംഗമായി മാറിയിരിക്കുകയാണ് പത്മജ ടീച്ചര്‍. ടീച്ചറുടെ അനണ്‍സ്മെന്റ് പഞ്ചായത്തിന്റെ എല്ലാ വാര്‍ഡുകളിലേക്കും വേണമെന്ന ആവശ്യവുമായി പ്രവര്‍ത്തകര്‍ നേതാക്കളെ സമീപിച്ചിരിക്കുകയാണ്. സംസ്ഥാനത്ത് രണ്ടാം ഘട്ടത്തില്‍ തെരഞ്ഞെടുപ്പ് നടക്കുന്ന തൃശൂര്‍ ജില്ലയില്‍ ഇന്ന് വൈകീട്ട് 5 മണിക്ക് പരസ്യ പ്രചരണം അവസാനിക്കുന്ന സാഹചര്യത്തില്‍ പത്മജ ടീച്ചറുടെ അനൗണ്‍സ്മെന്റ് എല്ലാ വാര്‍ഡുകളിലേക്കും പ്രചരണത്തിനെത്തിക്കാനാണ് എല്‍ഡിഎഫ് നേതൃത്വത്തിന്റെ തീരുമാനം. മുണ്ടത്തിക്കോട് സ്വദേശിനിയായ പത്മജ നമ്പ്യാര്‍ തൃശൂരില്‍ സംഗീത അധ്യാപികയായി പ്രവര്‍ത്തിക്കുമ്പോള്‍ തന്നെ കേച്ചേരിയിലെ നാദബ്രഹ്മ അക്കാദമി സംഘടിപ്പിക്കുന്ന സാംസ്‌ക്കാരിക പ്രവര്‍ത്തനങ്ങളിലും സജീവ സാന്നിധ്യമാണ്. തലക്കോട്ടുക്കര അസീസി സ്‌കൂളില്‍ കമ്പ്യൂട്ടര്‍ ടീച്ചറായും മുന്‍പ് പ്രവര്‍ത്തിച്ചിട്ടുണ്ട് പത്മജ ടീച്ചര്‍