മോഡിക്ക് ചിഹ്നം അരിവാള്‍ ചുറ്റിക നക്ഷത്രം

വാശിയേറിയ ഇത്തവണത്തെ സംസ്ഥാനത്ത് മത്സരിക്കാന്‍ മോഡിയും തയ്യാറാണ്. പത്തനംതിട്ട ജില്ലാ പഞ്ചായത്തിലേക്ക് മലയാലപ്പുഴ ഡിവിഷനിലാണ് അരിവാള്‍ ചുറ്റിക നക്ഷത്രം ചിഹ്നത്തില്‍ സിപിഎം സ്ഥാനാര്‍ത്ഥിയായി മോഡി മത്സരിക്കുന്നത്. മുഴുവന്‍ പേര് ജിജോ മോഡി എന്നാണെന്ന് മാത്രം.ഏതായാലും സ്ഥാനാര്‍ത്ഥിയുടെ പേരിലെ കൗതുകം തന്നെയാണ് ജില്ല പഞ്ചായത്തിലേക്കുള്ള മത്സരത്തില്‍ മലയാലപ്പുഴ ഡിവിഷനെ ആകര്‍ഷകമാക്കുന്നതും. പ്രചരണത്തിന് പോകുമ്ബോഴാണ് ഏറ്റവും രസം. വോട്ടര്‍മാരെ നേരില്‍ കണ്ട് വോട്ട് അഭ്യര്‍ത്ഥിക്കുമ്പോല്‍ പലര്‍ക്കും കൗതുകവും അത്ഭുതവുമാണ്.
ആള്‍ക്കാരുടെ ഈ കൗതുകം തെരഞ്ഞെടുപ്പ് ഫലത്തില്‍ പ്രതിഫലിക്കുമെന്നാണ് യുവസ്ഥാനാര്‍ത്ഥി പ്രതീക്ഷിക്കുന്നത്. സി പി എം കോന്നി താഴം ലോക്കല്‍ കമ്മിറ്റി സെക്രട്ടറിയാണ് ജിജോ മോഡി. യു ഡി എഫിന്റെ സിറ്റിംഗ് സീറ്റിലാണ് അരിവാള്‍ ചുറ്റിക നക്ഷത്രം ചിഹ്നത്തില്‍ ജിജോ മോഡി പോരിനിറങ്ങുന്നത്. കോണ്‍ഗ്രസിലെ സാമുവല്‍ കിഴക്കുപുറത്താണ് എതിര്‍ സ്ഥാനാര്‍ത്ഥി. പൊതുപ്രവര്‍ത്തനത്തിലേക്ക് എത്തുന്നതിന് മുമ്പ് മാധ്യമപ്രവര്‍ത്തകന്‍ ആയിരുന്നു ഇദ്ദേഹം. സ്വകാര്യ ചാനല്‍ സംപ്രേഷണം നിര്‍ത്തിയതോടെ മുഴുവന്‍ സമയ പൊതുപ്രവര്‍ത്തകന്‍ ആകുകയായിരുന്നു.