തദ്ദേശ തിരഞ്ഞെടുപ്പ് : കോവിഡ് ബാധിതർ ബൂത്തിലേക്കുള്ള യാത്രയ്ക്കിടെ പാതിവഴിയിൽ ഇറങ്ങിയാൽ കർശന നടപടി

തിരുവനന്തപുരം : തദ്ദേശ തിരഞ്ഞെടുപ്പിനു നേരിട്ടെത്തി വോട്ട് ചെയ്യുന്ന കോവിഡ് ബാധിതരും ക്വാറന്റീനിൽ കഴിയുന്നവരും പോളിങ് ബൂത്തിലേക്കുള്ള യാത്രയ്ക്കിടെ വഴിയിൽ ഇറങ്ങരുതെന്ന് ആരോഗ്യ വകുപ്പിന്റെ നിർദേശം. ഇക്കാര്യം നിരീക്ഷിക്കാൻ പ്രത്യേക സംഘത്തെ നിയോഗിക്കും. പാതിവഴിയിൽ ഇറങ്ങിയാൽ കർശന നടപടിയുണ്ടാകും.

വോട്ടെടുപ്പിനു തലേന്ന് ഉച്ചയ്ക്കു മൂന്നിനു ശേഷം കോവിഡ് ബാധിതരുടെയോ ക്വാറന്റീനിൽ കഴിയുന്നവരുടെയോ പട്ടികയിൽ ഉൾപ്പെടുന്നവർക്കാണ് അവസാനത്തെ ഒരു മണിക്കൂർ (വൈകിട്ട് 5 മുതൽ 6 വരെ) നേരിട്ടെത്തി വോട്ട് ചെയ്യാൻ കഴിയുക. അതിനു മുൻപു പട്ടികയിൽ ഉൾപ്പെട്ടവർക്കു തപാൽ ബാലറ്റ് നൽകും. ഇവർ പിന്നീടു കോവിഡ് മുക്തരായാലും തപാൽ വോട്ടു തന്നെ ചെയ്യണം.

കോവിഡ് പോസിറ്റീവ് ആയി ആശുപത്രിയിൽ കഴിയുന്നവർക്കു വോട്ട് ചെയ്യാനുള്ള സൗകര്യം ആരോഗ്യ വകുപ്പ് ഒരുക്കണം. എന്നാൽ‌ വീട്ടിലും സ്വകാര്യ ആശുപത്രികളിലും കഴിയുന്നവർ സ്വയം എത്തണം. ഇവർ 5 മണിക്കു വോട്ട് ചെയ്യാനെത്തുമ്പോൾ ഇതര വോട്ടർമാർ വരി നിൽക്കുന്നുണ്ടെങ്കിൽ അവരെല്ലാം വോട്ടു ചെയ്ത ശേഷം ബൂത്തിൽ കയറാം.

ഈ സമയത്തു ബൂത്തിനകത്തുള്ളവർ പിപിഇ കിറ്റ് ധരിക്കണം. വോട്ട് രേഖപ്പെടുത്തുമ്പോൾ കയ്യുറ നിർബന്ധം. ഓരോരുത്തരും ഒപ്പിടാൻ വെവ്വേറെ പേന ഉപയോഗിക്കണം.