തേയിലക്കൊളുന്തിന്റെ വില സര്‍വകാല റെക്കോഡില്‍

തേയിലക്കൊളുന്തിന്റെ വില സര്‍വകാല റെക്കോഡിലെത്തി. കിലോയ്ക്ക് 30 രൂപയ്ക്ക് മുകളിലാണ് ഇപ്പോള്‍ ലഭിക്കുന്ന വില. എന്നാല്‍ തേയിലപ്പൊടി ഇറക്കുമതി ചെയ്യാനുള്ള തീരുമാനം മൂലം കൂടിയ വില അധിക ദിവസം ലഭിക്കില്ലെന്നാണ് കര്‍ഷകരുടെ ആശങ്ക. ഇറക്കുമതി തീരുമാനത്തിനെതിരെ സമരം ശക്തമാക്കാനുളള തീരുമാനത്തിലാണ് കര്‍ഷക സംഘടനകള്‍. രണ്ടര പതിറ്റാണ്ടിന് ശേഷമാണ് തേയിലക്കൊളുന്തിന്റെ വില കിലോയ്ക്ക് 20 രൂപയ്ക്ക് മുകളിലെത്തുന്നത്. കഴിഞ്ഞ വര്‍ഷത്തെ അപേക്ഷിച്ച് ഉല്‍പ്പാദനം നാലിലൊന്നായി കുറഞ്ഞതാണ് വില കൂടാന്‍ കാരണം. ലോക്ക് ഡൗണ്‍ മൂലം ഉല്‍പ്പാദനം കുറഞ്ഞത് ചൂണ്ടിക്കാട്ടിയാണ് തേയിലപ്പൊടി ഇറക്കുമതി ചെയ്യാനുള്ള അനുമതി വന്‍കിടക്കാര്‍ നേടിയെടുത്തത്.ഇന്‍ഡോനേഷ്യ, വിയറ്റ്‌നാം എന്നിവിടങ്ങളില്‍ നിന്ന് നിലവാരം കുറഞ്ഞ തേയിലപ്പൊടി ഇറക്കുമതി ചെയ്ത് ഇന്ത്യന്‍ തേയിലപ്പൊടിയുമായി കൂട്ടിക്കലര്‍ത്തി കയറ്റുമതി ചെയ്യാനാണ് നീക്കം നടക്കുന്നത്. യൂറോപ്പില്‍ ഇന്ത്യന്‍ തേയിലപ്പൊടിക്കാണ് ഡിമാന്‍ഡ്. നികുതി വെട്ടിക്കാന്‍ ശ്രീലങ്കയില്‍ എത്തിച്ച ശേഷമായിരിക്കും ഇന്ത്യയിലേക്ക് ഇറക്കുമതി ചെയ്യുക. ഇതോടെ തേയിലയുടെ വില കുത്തനെ ഇടിയുകയും ചെയ്യും. തേയില ഇറക്കുമതി ചെയ്യാനുള്ള തീരുമാനം പിന്‍വലിക്കണമെന്നാവശ്യപ്പെട്ട് വിവിധ കഷക സംഘടനകള്‍ സമര രംഗത്തെത്തിയിട്ടുണ്ട്.. അടുത്തു തന്നെ സെക്രട്ടറിയേറ്റിനു മുന്നില്‍ സമരം നടത്താനും തീരുമാനിച്ചിട്ടുണ്ട്.