നയനി നരസിംഹ റെഡ്ഡി അന്തരിച്ചു.

ടിആർഎസിന്‍റെ സീനിയർ നേതാവും മുൻ സംസ്ഥാന ആഭ്യന്തര മന്ത്രിയുമായ നയനി നരസിംഹ റെഡ്ഡി (76) അന്തരിച്ചു. 2014ൽ രൂപവത്കരിച്ച തെലങ്കാനയിലെ ആദ്യ ആഭ്യന്തര മന്ത്രിയാണ് ഇദ്ദേഹം. കൊവിഡ് രോഗമുക്തനായ ശേഷം ശ്വാസകോശ സംബന്ധമായ അസുഖത്തിന് സ്വകാര്യ ആശുപത്രിയിൽ ചികിത്സയിൽ കഴിയുകയായിരുന്നു ടിആർഎസിന്‍റെ സ്ഥാപക നേതാവു കൂടിയായ റെഡ്ഡി. 

ഹൈദരാബാദിലെ സീനിയർ ട്രേഡ് യൂണിയൻ നേതാവായ ഇദ്ദേഹം തെലങ്കാന പ്രക്ഷോഭത്തിൽ നിർണായക പങ്കു വഹിച്ചിട്ടുണ്ട്. അവിഭക്ത ആന്ധ്രയിലെ നിയമസഭയിലേക്ക് മൂന്നു തവണ തെരഞ്ഞെടുക്കപ്പെട്ടു. 1978, 1985, 2004 വർഷങ്ങളിലായിരുന്നു ഇത്. 2004ൽ ടിആർഎസ് കോൺഗ്രസിന്‍റെ സഖ്യകക്ഷിയായിരുന്നപ്പോൾ അന്നത്തെ വൈ.എസ്. രാജശേഖര റെഡ്ഡി സർക്കാരിലും മന്ത്രിയായിരുന്നിട്ടുണ്ട് റെഡ്ഡി. 

ഇന്നലെ ആശുപത്രിയിലെത്തി മുഖ്യമന്ത്രി കെ. ചന്ദ്രശേഖർ റാവു റെഡ്ഡിയുടെ രോഗവിവരങ്ങൾ ആരാഞ്ഞിരുന്നു. തെലങ്കാന പ്രക്ഷോഭത്തിലും തെലങ്കാന സർക്കാരിലും ഒന്നിച്ചു പ്രവർത്തിച്ചതിന്‍റെ ഓർമകൾ അനുസ്മരിച്ചാണ് ചന്ദ്രശേഖർ റാവുവിന്‍റെ അനുശോചന സന്ദേശം. ഔദ്യോഗിക ബഹുമതികളോടെയാവും നരസിംഹ റെഡ്ഡിയുടെ സംസ്കാരമെന്നു മുഖ്യമന്ത്രി വ്യക്തമാക്കി.