‘ഇനി വീട്ടിലേയ്ക്കില്ല,കെവിന്റെ ഭാര്യയായി ജീവിയ്ക്കും’,നെഞ്ചു പൊട്ടി നീനു

കോട്ടയം:പ്രണയ വിവാഹത്തേ തുടര്‍ന്ന് അരുംകൊലയ്ക്ക് ഇരയായ കെവിന്റെ വധു നീനു ഇനി വീട്ടിലേയ്ക്കു തിരികെ പോകില്ല.കെവിന്റെ ഭാര്യയായി തന്നെ ഇനിയുള്ള കാലം ജീവിക്കുമെന്ന് നെഞ്ചുപൊട്ടി ആ പെണ്‍കുട്ടി പറഞ്ഞു.കൊലപാതക വാര്‍ത്ത വന്നയുടന്‍ തിരികെ വീട്ടിലെത്തണമെന്ന് നീനുവിന്‌റെ വീട്ടുകാര്‍ പലതവണ ആവശ്യപ്പെട്ടിട്ടും ഇനിയുള്ള കാലം കെവിന്റെ അച്ഛനും അമ്മയ്ക്കും സഹോദരിയ്ക്കും താങ്ങായി അവരുടെ കുടുംബത്തില്‍ തുടരുമെന്ന് നീനു സങ്കടക്കടലിലും പറഞ്ഞു

തന്റെ സഹോദരന്‍ കെവിനെ ഒരിക്കലും കൊല്ലുമെന്ന് പ്രതീക്ഷിച്ചിരുന്നില്ല. വീട്ടുകാരുടെ അറിവോടെത തന്നെയാണ് കൊല നടത്തിയതെന്നും നീനു പ്രതികരിച്ചു. താഴ്ന്ന സാമ്പത്തിക ചുറ്റുപാടും തന്റെ ജാതിയേക്കാള്‍ താഴ്ന്ന ജാതിയായതിനാല്‍ കെവിനുമായുള്ള ബന്ധം തുടക്കം മുതലെ വീട്ടുകാര്‍ എതിര്‍ത്തിരുന്നു. പല തവണ വീട്ടിലേക്ക് തിരികെയെത്തണമെന്ന് മാതാപിതാക്കളും സഹോദരനും ആവശ്യപ്പെട്ടിരുന്നു.

കേസില്‍ പെണ്‍കുട്ടിയുടെ സഹോദരന്‍ ഷാനു ഉള്‍പ്പെടെ 13 പേരാണ് പ്രതികളായുള്ളത്. സംഘത്തില്‍ 13പേര്‍ ഉണ്ടായതായി പിടിയിലായ പ്രതി മൊഴി നല്‍കിയിട്ടുണ്ട്. കെവിന്റെ മൃതദേഹം തിങ്കളാഴ്ച രാവിലെ എട്ടരയോടെ കൊല്ലം തെന്മല ചാലിയക്കര തോട്ടിലാണു കണ്ടെത്തിയത്. പോസ്റ്റ്‌മോര്‍ട്ടം കോട്ടയം മെഡിക്കല്‍ കോളജില്‍ പൂര്‍ത്തിയായി.