മുംബൈയില്‍ ഭീതി വിതച്ച് മഴ; അഞ്ച് മരണം:തുരന്തോ എക്‌സ്പ്രസിന്റൊ കോച്ചുകള്‍ പാളം തെറ്റി

മുംബൈ: മുബൈയില്‍ മൂന്നാം ദിവസവും മഴ കനക്കുന്നു. മഴയില്‍ ഇതുവരെ ഉണ്ടായ അപകടങ്ങളില്‍ അഞ്ച് പേരാണ് മരിച്ചത്. ഇവരില്‍ രണ്ട് പേര്‍ കുട്ടികളാണ്. മുബൈയില്‍ മുഴുവന്‍ വിദ്യാഭ്യാസ സ്ഥാപനങ്ങളടക്കം നിരവധി സ്ഥാപനങ്ങള്‍ അടച്ചിട്ടിരിക്കുകയാണ്. അത്യാവശ്യ കാര്യങ്ങള്‍ക്കല്ലാതെ ജനങ്ങള്‍ വീടിനു പുറത്തിറങ്ങരുതെന്ന് മുഖ്യമന്ത്രി ദേവേന്ദ്ര ഫഡ്‌നാവിസ് ട്വിറ്ററിലൂടെ ആവശ്യപ്പെട്ടിട്ടുണ്ട്.

കനത്ത മഴയെത്തുടര്‍ന്നുണ്ടായ മണ്ണിടിച്ചിലില്‍ പാളം തകര്‍ന്ന് നാഗ്പുര്‍-മുംബൈ തുരന്തോ എക്‌സ്പ്രസിന്റൊ ഒന്പതു കോച്ചുകള്‍ പാളം തെറ്റി.12 പേര്‍ക്കു പരിക്കേറ്റു. വസിന്ദ്, അസാന്‍ഗാവ് സ്റ്റേഷനുകള്‍ക്കിടയിലാണു ട്രെയിന്‍ പാളം തെറ്റിയത്. ഇന്നലെ രാവിലെ ആറരയ്ക്കായിരുന്നു സംഭവം. കനത്ത മഴയെത്തുടര്‍ന്നു പെട്ടെന്നുണ്ടായ മണ്ണിടിച്ചിലിലാണു ട്രെയിന്‍ പാളം തെറ്റിയത്. ഡ്രൈവറുടെ മനഃസാന്നിധ്യമാണ് വന്‍ അപകടം ഒഴിവാക്കിയത്. ആകെ 18 കോച്ചുകളാണു ട്രെയിനിനുണ്ടായിരുന്നത്.

മഴ ശക്തമായതോടെ റോഡുകളിലെല്ലാം മാലിന്യം അടിഞ്ഞു കൂടി ഗതാഗതം തടസ്സപ്പെട്ടിരിക്കുകയാണ്. പത്തോളം വിമാനങ്ങളും 17 ട്രെയിനുകളുടെയും സര്‍വീസ് ഇന്നത്തേക്ക് റദ്ദാക്കി. പുനരധിവാസത്തിന്റെ ആവശ്യത്തിന് മാത്രമായാണ് ലോക്കല്‍ ട്രെയിനുകള്‍ സര്‍വീസ് നടത്തുന്നത്.

സ്വകാര്യ ജീവനക്കാര്‍ക്ക് അവധി നല്‍കാന്‍ സര്‍ക്കാര്‍ സ്ഥാപനങ്ങളോട് ആവശ്യപ്പെട്ടിരുന്നു. അവശ്യ സര്‍വീസുകളൊഴികെയുള്ള ഗവണ്‍മെന്റ് ജീവനക്കാര്‍ക്ക് അവധി നല്‍കിയിട്ടുണ്ട്. അതേസമയം സ്റ്റോക്ക് എക്‌സ്‌ചേഞ്ചുകളായ ബി.എസ്.ഇ, എന്‍.എസ്.ഇ എന്നിവ തുറന്ന് പ്രവര്‍ത്തിക്കുമെന്നും സര്‍ക്കാര്‍ അറിയിച്ചിട്ടുണ്ട്. ദേശീയ ദുരന്തനിവാരണ സേന മുബൈയില്‍ സേവനം ആരംഭിച്ചിട്ടുണ്ട്. അടുത്ത 24 മണിക്കൂര്‍ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രം അറിയിച്ചിരിക്കുന്നത്