പിവി അന്‍വറിന്റെ ചെക്ക് ഡാം പൊളിക്കും

പിവി അന്‍വര്‍ എംഎല്‍എയുടെ പേരിലുള്ള അനധികൃത ചെക്ക് ഡാം പൊളിക്കല്‍ നടപടികളുമായി ജലസേചന വകുപ്പ്‌. കക്കാടം പൊയിലില്‍ നിര്‍മ്മിച്ചിരിക്കുന്ന ഡാം പൊളിച്ചു മാറ്റുന്നതിനായി മലപ്പുറം ഡപ്യുട്ടി കളക്ടര്‍ ടി.ഒ. അരുണ്‍ ഉത്തരവിട്ടതായിട്ടാണ് റിപ്പോര്‍ട്ടുകള്‍. ഡാം നിര്‍മ്മിച്ചിരിക്കുന്നത് നാട്ടുകാരുടെ കുടിവെള്ളം മുട്ടിക്കുന്ന രീതിയിലാണെന്നാണ് കണ്ടെത്തല്‍. നേരത്തേ ഇദ്ദേഹം നല്‍കിയ നിര്‍ദേശം അനുസരിച്ച് അടിസ്ഥാനത്തില്‍ അധികൃതര്‍ സ്ഥലം സന്ദര്‍ശിക്കുകയും പ്രാഥമിക എസ്റ്റിമേറ്റ് തയ്യാറാക്കുകയും ചെയ്തിരുന്നു. ഇത് ജില്ലാ കളക്ടര്‍ക്ക് നാളെ സമര്‍പ്പിച്ച ശേഷമായിരിക്കും തടയണ പൊളിച്ചുമാറ്റാനുള്ള നടപടികള്‍ സ്വീകരിക്കുക. പ്രദേശവാസികളുടെ കുടിവെള്ളം മുട്ടിക്കുന്ന രീതിയിലാണ് ചെക്ക്ഡാം നിര്‍മ്മിച്ചിരിക്കുന്നതെന്നാണ് വകുപ്പ് അധികൃതരുടെ കണ്ടെത്തല്‍. നേരത്തേ താന്‍ നിയമലംഘനം നടത്തിയിട്ടില്ലെന്ന് എംഎല്‍എ പറഞ്ഞിരുന്നെങ്കിലും വാദം പൂര്‍ണ്ണമായും തെറ്റാണെന്ന് കണ്ടെത്തിയതോടെയാണ് അധികൃതര്‍ പൊളിക്കല്‍ നടപടിയുമായി മുമ്പോട്ടു പോകാന്‍ തീരുമാനിച്ചത്. എല്ലാ അനുമതികളോടും കൂടിയാണ് പാര്‍ക്കിന്റെ പ്രവര്‍ത്തനമെന്നാണ് നേരത്തേ പി വി അന്‍വര്‍ എംഎല്‍എ അവകാശവാദം ഉയര്‍ത്തിയത്. പാര്‍ക്ക് പരിസ്ഥിതി ലോല പ്രദേശത്താണെന്ന വാദം ശരിയല്ലെന്നും പറഞ്ഞു.