കാലവര്‍ഷം കനത്തു:ജാഗ്രത

സംസ്ഥാനത്ത് കാലവര്‍ഷം കനത്ത സാഹചര്യത്തില്‍ ദുരന്ത നിവാരണ സേനയുടെ ജാഗ്രതാ നിര്‍ദ്ദേശം.മിക്കവാറുമുള്ള നദികളെല്ലാം കരകവിഞ്ഞൊഴുകുന്നതിനാല്‍ നദികളുടെയും അരുവികളുടെയും തീരത്ത് പോകരുതെന്നും മുന്നറിയിപ്പില്‍ നിര്‍ദ്ദേശമുണ്ട്.ഉരുള്‍ പൊട്ടലിനുള്ള സാധ്യത മുന്നില്‍ കണ്ട് മലയോര പ്രദേശങ്ങളിലുള്ളവരും ജാഗ്രത പാലിക്കണമെന്ന് നിര്‍ദ്ദേശമുണ്ട്.

ഇടുക്കിയില്‍ കനത്ത മഴ തുടരുന്നു.പലയിടത്തും കൃഷിനാശമുണ്ടായി.മലങ്കര അണക്കെട്ടിന്റെ ഷട്ടറുകള്‍ തുറന്നു.തൊടുപുഴയാറിന്റെയും മീനച്ചിലാറിന്റെയും ഇരുകരകളിലും താമസിക്കുന്നവര്‍ക്ക ജില്ലാ ഭരണകൂടം ജാഗ്രതാ നിര്‍ദ്ദേശം നല്‍കിയിട്ടുണ്ട്.

ഇടുക്കി അണക്കെട്ടിലെ ജലനിരപ്പ് രണ്ടടി ഉയര്‍ന്നിട്ടുണ്ട്.മുല്ലപ്പെരിയാറില്‍ ജലനിരപ്പുയര്‍ന്നതോടെ ബോട്ടിംഗ് പുനരാരംഭിച്ചു.കാലവര്‍ഷം ശക്തമായ സാഹചര്യത്തില്‍ ഇടുക്കി ജില്ലയിലേക്കുള്ള യാത്ര ഒഴിവാക്കണമെന്ന് പൊലീസ് നിര്‍ദ്ദേശിച്ചു.

ടകാച്ചി നഗരത്തില്‍ മിക്കയിടങ്ങളിലും വെള്ളക്കെട്ട് അനുഭവപ്പെടുന്നുണ്ട്.കൊച്ചി-മധുര ദേശീയപാതയില്‍ മൂവാറ്റുപുഴയ്ക്കും തൃപ്പൂണിത്തുറയ്ക്കും ഇടയില്‍ വെള്ളം കയറിയതിനാല്‍ ഗതാഗതതടസവും അനുഭപ്പെട്ടു. താമരശേരി ചുരത്തില്‍ മണ്ണിടിഞ്ഞു വീണ് ഗതാഗതം തടസ്സപ്പെട്ടിട്ടുണ്ട്‌

മണിക്കൂറില്‍ കാറ്റിന്റെ വേഗത കൂടാനുള്ള സാധ്യത കണക്കിലെടുത്ത് കടലില്‍ മല്‍സ്യബന്ധനത്തിനായി പോകുന്ന മല്‍സ്യത്തൊഴിലാളികള്‍ക്കും മുന്നറിയിപ്പ് നല്‍കിയിട്ടുണ്ട്.നാലു ദിവസം കൂടി കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.