മൂന്നാറിലായിരുന്ന യതീശ് ചന്ദ്ര ലാത്തിചാര്‍ജിന് നേതൃത്വം കൊടുത്തോ? വാലും തലയുമില്ലാത്ത വാര്‍ത്തകള്‍ക്കു പിന്നിലാര് ?

ഗീതു ചന്ദ്രകാന്ത്

കൊച്ചി പുതുവൈപ്പിലെ സമരക്കാരേ തല്ലിച്ചതച്ച പൊലീസ് നടപടിക്ക് നിര്‍ദ്ദേശം കൊടുത്തതും നേതൃത്വം കൊടുത്തതും എറണാകുളം ഡിസിപി യതീശ് ചന്ദ്ര ആണെന്ന രീതിയില്‍ പ്രചരിക്കുന്ന വാര്‍ത്ത അടിസ്ഥാന രഹിതം. ഇക്കാര്യത്തില്‍ യതീശ് ചന്ദ്രയെ പുലഭ്യം പറഞ്ഞ സൈബര്‍ പോരാളികള്‍ മുതല്‍ പുറത്താക്കണമെന്നാവശ്യപ്പെട്ട മുതിര്‍ന്ന സിപിഎം നേതാവും ഭരണപരിഷ്‌ക്കാര കമ്മീഷന്‍ ചെയര്‍മാനുമായ വി എസ് അച്യുതാനന്ദന്‍ വരെ രംഗത്തെത്തിയത് വേണ്ടത്ര ധാരണയില്ലാതെയെന്ന് വ്യക്തം.

എറണാകുളം ഡിസിപിയുടെ ഓഫീസ് സ്ഥിതി ചെയ്യുന്ന കമ്മീഷണര്‍ ഓഫീസിനടുത്താണ് പുതുവൈപ്പ് വരുന്നത്. എന്നാല്‍ പൊലീസ് കണക്കില്‍ ആലുവ റൂറല്‍ എസ് പിയുടെ അധികാര പരിധിയില്‍ വരുന്ന പ്രദേശമാണത്. 'പുതുവൈപ്പിലേക്ക് ഡിസിപിയുടെ ഓഫീസ് സ്ഥിതി ചെയ്യുന്ന കമ്മീഷണര്‍ ഓഫീസില്‍ നിന്നും അഞ്ചു മിനിറ്റ് മാത്രമേ അകലം കാണൂ. കമ്മീഷണറോഫീസിനടുത്ത് വലിയൊരു സംഘര്‍ഷം ഉണ്ടാകുമ്പോള്‍ കമ്മീഷണര്‍ ഓഫീസില്‍ നിന്ന് ചിലപ്പോള്‍ ഫോഴ്‌സ് അവിടെയെത്തിയേക്കാം. പക്ഷേ ഡിസിപിയുടെ അധികാരപരിധയിലെ സ്ഥലമല്ല പുതുവൈപ്പ്. ആലുവ റൂറല്‍ എസ് പിയുടെ അധികാര പരിധിയിലെ സ്ഥലമാണ്. മാത്രമല്ല ഇന്നലെ മൂന്നാറിലായിരുന്ന ഞാനെങ്ങനെ സമരക്കാരേ തല്ലിച്ചതയ്ക്കാന്‍ നേതൃത്വം കൊടുക്കുക?. യതീശ് ചന്ദ്ര ഹെഡ്‌ലൈന്‍ കേരളയോട് ചോദിച്ചു.

താന്‍ മുമ്പ് ഒന്നര വര്‍ഷത്തോളം ആലുവ എസ് പി ആയിരുന്നു എന്ന കാര്യം ഓര്‍മിപ്പിച്ച യതീശ് ചന്ദ്ര ഒരു പക്ഷേ ഏത് സ്ഥലത്തെ പൊലീസ് ഓഫീസര്‍ക്കാണ് അവിടെ ചുമതലയെന്നുമുള്ള സാമാന്യ അറിവില്ലാത്തവരാകാം ഇക്കാര്യത്തിലേക്ക് തന്നെ വലിച്ചിഴച്ചതെന്നും പറയുന്നു.

പുതുവൈപ്പില്‍ ഇന്‍ഡ്യന്‍ ഓയില്‍ കോര്‍പറേഷന്‍ സ്ഥാപിക്കാനിരിക്കുന്ന എല്‍പിജി സംഭരണ ശാലയുമായി ബന്ധപ്പെട്ടാണ് ജനങ്ങള്‍ സമരം ചെയ്യുന്നത്.എല്‍പിജി സംഭരണശാല അവിടെ നിന്ന് മാറ്റി സ്ഥാപിക്കണമെന്നാണ് സ്ഥലവാസികളുടെ ആവശ്യം.നേരത്തേ പ്ലാന്റിന്റെ നിര്‍മ്മാണപ്രവര്‍ത്തനം മന്ത്രി മെഴ്‌സിക്കുട്ടിയമ്മയുടെ ഇടപെടലിനെ തുടര്‍ന്ന് നിര്‍ത്തിവെയ്ക്കുകയായിരുന്നു.എന്നാല്‍ മന്ത്രിയുടെ ഉറപ്പ് ലംഘിച്ച് കഴിഞ്ഞ ദിവസം പൊലീസ് സഹായത്തോടെ വീണ്ടും നിര്‍മ്മാണം ആരംഭിച്ചു.തുടര്‍ന്ന് സ്ത്രീകളും കുട്ടികളുമുള്‍പ്പടെയുള്ള ജനങ്ങളാണ് സമരത്തിനെത്തിയത്. സംഭവത്തില്‍ പൊലീസ് ഇടപെടുകയും ചെയ്തതോടെ സംഘര്‍ഷമുണ്ടായി. ആലുവ റൂറല്‍ എസ് പി ജോര്‍ജ് ഇന്ന് രാവിലെ പുതുവൈപ്പ് സംഭവത്തേക്കുറിച്ച് മാധ്യമപ്രവര്‍ത്തകരോട് വിശദീകരിച്ചിരുന്നു.