ചാണ്ടി ഓണ്‍ ആക്ഷന്‍ ആനവണ്ടിയില്‍ കൂട്ടപ്പിരിച്ചുവിടല്‍

പ്രത്യേകലേഖകന്‍

തിരുവനന്തപുരം : ശമ്പളവും പെന്‍ഷനും മുടങ്ങിക്കടക്കുന്ന കെ എസ് ആര്‍ ടി സിയില്‍ നിന്ന് കൂടുതല്‍ എം.പാനല്‍ ജീവനക്കാരെ പിരിച്ചു വിടുന്നതിന് നടപടി തുടങ്ങി. സ്ഥിരം ജീവനക്കാരെ നിലനിര്‍ത്തി കോര്‍പ്പറേഷന്‍ മുന്നോു കൊണ്ടുപോകുന്നതിനാണ് ഈ നടപടിയെന്നാണ് പ്രചരണം. മെക്കാനിക്കല്‍ വിഭാഗത്തിലെ അഞ്ഞൂറോളം എം പാനലുകാരെ രണ്ട് ഘട്ടങ്ങളിലായി പിരിച്ചു വിട്ടിരുന്നു. എം പാനലുകാര്‍ തുടര്‍ന്നാല്‍ സ്ഥിരം ജീവനക്കാരുടെ കാര്യം അവതാളത്തിലാകും എന്ന രീതിയില്‍ കാര്യങ്ങള്‍ ജീവനക്കാര്‍ക്ക് ഇടയില്‍ എത്തിയിരിക്കുന്നതിനാല്‍ പ്രശ്നം ഏറ്റെടുക്കാന്‍ തൊഴിലാളി സംഘടകളും മടിക്കുകയാണ്. കണ്ടക്ടര്‍,ഡ്രൈവര്‍ ജോലി ചെയ്യുന്ന എം പാനലുകാരെയാണ് പിരിച്ചു വിടുന്നത്. രണ്ടു വിഭാഗത്തിലുമായി 7,500 ജീവനക്കാരാണുള്ളത്. അതില്‍ രണ്ടായിരം പേരെ പിരിച്ചു വിടാനാണ് തീരുമാനം. ജീവനക്കാരുടെ എണ്ണം കുറച്ച് ദേശീയ ശരാശരിയിലെത്തിച്ചാലേ നഷ്ടത്തിന്റെ തോത് കുറയ്ക്കാനാവൂ എന്ന സുശില്‍ ഖന്ന റിപ്പോര്‍ട്ടിന്റെ അടിസ്ഥാനത്തിലാണ് നടപടി.

കെ.എസ്.ആര്‍.ടി.സിയില്‍ ഇപ്പോള്‍ 35,341 സ്ഥിരം ജീവനക്കാരും 8,549 താത്കാലിക ജീവനക്കാരും ഉള്‍പ്പെടെ ആകെ 43,890 പേരാണുള്ളത്. നിരത്തിലിറക്കുന്ന ബസുകള്‍ 5160. രണ്ടു വര്‍ഷത്തിനുള്ളില്‍ അനുപാതം ആറാക്കിയാല്‍ 5160 ബസുകള്‍ക്ക് 39,960 ജീവനക്കാര്‍ മതിയാവും. 12,930 ജീവനക്കാരെ ഒഴിവാക്കേണ്ടി വരും. അതില്‍ 4,381 പേര്‍ സ്ഥിരം ജീവനക്കാരാണ്. അവരെ പിരിച്ചു വിടാനാവില്ല. ഈ സാഹചര്യത്തിലാണ് 8549 താത്കാലിക ജീവനക്കാരുടെ ജോലി ത്രിശങ്കുവിലായത്. ഇതു കൂടാതെ അടുത്ത അഞ്ച് വര്‍ഷത്തേക്ക് പുതിയ നിയമനമൊന്നും നടത്തേണ്ടതില്ലെന്നാണ് കെ.എസ്.ആര്‍.ടി.സിയുടെ തീരുമാനം.