പ്രധാനമന്ത്രിയുടെ വരവുമായി ബന്ധപ്പെട്ട് കൊച്ചിയില്‍ സുരക്ഷ ശക്തമാക്കി

പ്രധാനമന്ത്രിയുടെ വരവുമായി ബന്ധപ്പെട്ട് കൊച്ചിയില്‍ സുരക്ഷ ശക്തമാക്കി. രണ്ട് പരിപാടികളിലാണ് പ്രധാനമന്ത്രി പങ്കെടുക്കുക. കൊച്ചി മെട്രോയുടെ ഉദ്ഘാടനത്തിന് പുറമെ പി.എന്‍. പണിക്കര്‍ ഫൗണ്ടേഷന്‍ സംഘടിപ്പിക്കുന്ന ദേശീയ വായനാ മാസാചരണത്തിന്റെ ഉദ്ഘാടനവും പ്രധാനമന്ത്രി നിര്‍വഹിക്കും. രാവിലെ 10.15ന് വ്യോമസേനയുടെ പ്രത്യേക വിമാനത്തില്‍ നാവിക വിമാനത്താവളമായ ഐ.എന്‍.എസ് ഗരുഡയിലെത്തുന്ന പ്രധാനമന്ത്രി റോഡ് മാര്‍ഗം വന്ന് 10.35ന് പാലാരിവട്ടം സ്റ്റേഷനിലെത്തും .

പാലാരിവട്ടത്തു നിന്നും മെട്രോ ട്രെയിനില്‍ പത്തടിപ്പാലത്തേക്കും തിരിച്ചും യാത്രചെയ്യും. 11 ന് കലൂര്‍ ജവഹര്‍ലാല്‍ നെഹ്‌റ്റേഡിയത്തില്‍ കൊച്ചി മെട്രോയുടെ സമര്‍പ്പണം നിര്‍വഹിക്കും. 12.15ന് സെന്റ് തെരേസാസ് കോളേജില്‍ പി.എന്‍. പണിക്കര്‍ ദേശീയ വായനാമാസാചരണം ഉദ്ഘാടനം ചെയ്തശേഷം ഉച്ചയ്ക്ക് 1.05ന് നാവിക വിമാനത്താവളത്തിലെത്തുന്ന പ്രധാനമന്ത്രി അവിടത്തെ ബോര്‍ഡ് റൂമില്‍ മുഖ്യമന്ത്രിയും മന്ത്രിമാരുമായി കൂടിക്കാഴ്ച്ച നടത്തും. 1.25നാണ് മടക്കയാത്ര.

കനത്തസുരക്ഷയാണ് മെട്രോ ഉദ്ഘാടനവേദിയില്‍. പന്തലില്‍ 3500 പേര്‍ക്കാണ് പ്രവേശനം. ക്ഷണിതാക്കള്‍ ക്ഷണപത്രികയും തിരിച്ചറിയല്‍ കാര്‍ഡുമായി വരണം. സെന്റ് തെരേസാസിലും ക്ഷണിതാക്കള്‍ക്കു മാത്രമേ പ്രവേശനമുള്ളൂ.