സിംഹാസനം തള്ളി കടകംപള്ളി, അനുഗ്രഹം നേടി സുധാകരനും ഐസക്കും

സിപിഎം നേതാക്കള്‍ നിയമസഭയിലും പുറത്തും ഹിന്ദു സന്യാസിമാര്‍ക്കെതിരെ ആഞ്ഞടിക്കുന്നതിനിടെ പിണറായി മന്ത്രി സഭയിലെ പ്രമുഖരായ ജി സുധാകരനും തോമസ് ഐസക്കും ആലപ്പുഴയില്‍ ശൃംഗേരി ശാരദാപീഠം മഠാധിപതി ഭാരതീതീര്‍ത്ഥ സ്വാമിയെ ദര്‍ശനം നടത്തി. സ്വാമിയെ ആചാരപരമായി ദര്‍ശിച്ച ഇരുവരും അനുഗ്രഹവും വാങ്ങിയാണ് മടങ്ങിയത്. തിരുവനന്തപുരത്ത് സ്വാമിയുടെ ലിംഗച്ഛേദം നടത്തിയ സംഭവത്തിനു ശേഷം വിവിധ വേദികളില്‍ സന്യാസിമാര്‍ക്കെതിരെ സുധാകരന്‍ ആഞ്ഞടിച്ചിരുന്നു.

കേരളത്തിലെ നിരവധി സ്ത്രീകള്‍ സന്യാസിമാര്‍ക്ക് പാലു പഴവും നല്‍കുന്നുവെന്നാക്ഷേപിച്ച സുധാകരന്‍ നിറയെ പഴങ്ങളടങ്ങിയ വലിയൊരു തട്ടവുമായാണ് ശൃംഗേരി മഠാധിപതിയെ ദര്‍ശിക്കാനെത്തിയത്. ഇന്നലെ രാവിലെ പതിനൊന്നു മണിയോടെയാണ് സുധാകരനും തോമസ് ഐസക്കും തങ്ങളുടെ തട്ടകത്തെത്തിയ സ്വാമിയുടെ ദര്‍ശനത്തിനെത്തിയത്. നേരത്തേ ഭക്തര്‍ക്ക് ദര്‍ശനം നല്‍കാന്‍ ആലപ്പുഴ എസ്ഡിവി ഹാളിലെത്തിയ സ്വാമി അവിടെ കാത്തിരുന്ന മന്ത്രിമാര്‍ക്കാണ് ആദ്യം ദര്‍ശനം നല്‍കിയത്.ഇരുവരെയും സ്വാമിയുടെ സെക്രട്ടറി പൊന്നാടയണിച്ചു സ്വീകരിച്ചു.സിംഹാസനത്തിലിരുന്ന സ്വാമിയ്ക്ക് ഇരുവരും ചേര്‍ന്ന് തളികയില്‍ പഴങ്ങള്‍ സമര്‍പ്പിച്ചു. തുടര്‍ന്ന് സ്വാമി ഇരുവര്‍ക്കും ആപ്പിള്‍ പ്രസാദമായി നല്‍കി, മന്ത്രി കടകംപള്ളി വേദിയിലെ സിംഹാസനം തള്ളി മാറ്റിയത് പുരോഗമന വാദികളുടെ പ്രശംസ പിടിച്ചുപറ്റിയിരുന്നു. ജനാധിപത്യത്തില്‍ ഇത്തരം സിംഹാസനങ്ങള്‍ അസംബന്ധമാണെന്നായിരുന്നു മന്ത്രിയുടെ വാദം.