വി എസിന്റെ’ കാളപിതാവും ഗോമാതാവും’പിന്നെ വിദേശത്ത് സ്വയമ്പന്‍ ബീഫ് തിന്നുന്ന മോദിയും

സഖാവ് വി എസ് എന്നും രസികനാണ്.നിയമസഭയിലായാലും പൊതുസമ്മേളനങ്ങളിലാണെങ്കിലും മാധ്യമപ്രവര്‍ത്തകരോടാണെങ്കിലും അദ്ദേഹത്തിന്റെ നീട്ടിയും കുറുക്കിയും പരിഹാസത്തോടെയും പുച്ഛത്തോടെയുമുള്ള സംഭാഷണശൈലി പേരുകേട്ടതാണ്.ഇന്ന് സഭയില്‍ ബീഫിനു വേണ്ടി കൂടിയ നിയമസഭയിലും സഖാവിന്റെ വക രസികന്‍ പരിഹാസം ബിജെപിയ്ക്കുണ്ടായി.

ബി.ജെ.പിക്കെതിരെ ആഞ്ഞടിച്ച് വി.എസ് അച്യുതാനന്ദന്‍. കാളപിതാവിനും ഗോമാതാവിനുമായി ഡാര്‍വിനെ വെല്ലുന്ന സിദ്ധാന്തങ്ങളാണ് കേന്ദ്രസര്‍ക്കാര്‍ സൃഷ്ടിക്കുന്നതെന്ന് വി.എസ്. കന്നുകാലി സംരക്ഷണത്തിന്റെ പേരില്‍ ബി.ജെ.പി നടപ്പാക്കുന്നത് വര്‍ഗ്ഗീയ അജണ്ടയാണെന്നും വിപണിയില്‍ വര്‍ഗ്ഗീയത കലര്‍ത്താനാണ് ബി.ജെ.പി ശ്രമിക്കുന്നതെന്നും വി.എസ് സഭയില്‍ പറഞ്ഞു.

ഈ പോക്കു പോയാല്‍ ബി.ജെ.പിയുടെ കാര്യം പോക്കാണെന്നും അദ്ദേഹം പറഞ്ഞു. പ്രധാനമന്ത്രി ഇതൊന്നും അറിയുന്നില്ലെങ്കില്‍ ഇടയ്ക്ക് ഇന്ത്യയില്‍ വരുമ്പോള്‍ എങ്കിലും കാര്യങ്ങള്‍ മനസ്സിലാക്കണം. യൂറോപ്യന്‍ രാജ്യങ്ങളില്‍ 'സ്വയമ്പന്‍' ബീഫ് കഴിച്ചു നടക്കുകയാണ് പ്രധാനമന്ത്രിയെന്നും വി.എസ് അച്യുതാനന്ദന്‍ നിയമസഭയില്‍ പറഞ്ഞു.