നടി അമല റോസ് കുര്യന്റെ പേരില്‍ വ്യാജ എഫ്ബി അക്കൗണ്ട്‌

ഫെയ്സ്ബുക്കില്‍ നിങ്ങള്‍ക്കും ലഭിച്ചേക്കാം​ ഇവളുടെ പ്രണയാഭ്യര്‍ത്ഥന; പിന്നില്‍ ഒളിഞ്ഞിരിക്കുന്നത് വന്‍ ചതി നടിയും അവതാരകയുമായ അമല റോസ് കുര്യന്റെ പേര് ചിത്രം ഉപയോഗിച്ച് സോഷ്യല്‍ മീഡിയയില്‍ തട്ടിപ്പിന് ശ്രമം. തന്റെ ചിത്രം ദുരുപയോഗം ചെയ്ത് വ്യാജ അക്കൗണ്ട് സൃഷ്ടിച്ചതായാണ് നടിയുടെ പരാതി. ഈ വ്യാജ അക്കൗണ്ടുകളില്‍ നിന്ന് പലര്‍ക്കും പ്രണയാഭ്യര്‍ത്ഥനയും പോകുന്നതായും അമല ആരോപിച്ചു. തന്റെ ചിത്രം ഉപയോഗിച്ച് പ്രവര്‍ത്തിക്കുന്ന ഫേക്ക് അക്കൗണ്ടുകള്‍ക്കെതിരെ പോലീസില്‍ പരാതി നല്‍കിയെങ്കിലും നടപടിയുണ്ടായില്ലെന്നും അമല പറഞ്ഞു. ഒരു സുഹൃത്ത് വഴിയാണ് വ്യാജ അക്കൗണ്ടിനെക്കുറിച്ച് അറിഞ്ഞത്. അദ്ദേഹത്തിന്റെ സഹോദരനെ വ്യാജ അക്കൗണ്ടിന് പിന്നിലുള്ളയാള്‍ വഞ്ചിച്ചിരുന്നു. തന്നെക്കുറിച്ചുള്ള സകല വിവരങ്ങളും അറിഞ്ഞു വച്ചുകൊണ്ടാണ് വ്യാജ അക്കൗണ്ട് പ്രവര്‍ത്തിക്കുന്നതെന്ന് അമല പറഞ്ഞു. ദീപ്തി, നിഖിത ഇമ്മാനുവല്‍, നിമ്മി, തുമ്പി തുടങ്ങിയ പേരുകളിലാണ് ഫേക്ക് അക്കൗണ്ടുകള്‍ പ്രവര്‍ത്തിക്കുന്നത്. ഫെയ്‌സ്ബുക്കിലൂടെ പരിചയപ്പെടുന്ന പുരുഷന്‍മാര്‍ക്ക് പ്രണയാഭ്യര്‍ത്ഥനയും വിവാഹാഭ്യര്‍ത്ഥനയും നല്‍കിയാണ് തട്ടിപ്പ് നടക്കുന്നത്. ചില ഫോണ്‍ നമ്പറുകളില്‍ നിന്നും ഇവര്‍ പുരുഷന്‍മാരെ ബന്ധപ്പെടാറുമുണ്ട്. തമിഴും മലയാളവും സംസാരിക്കുന്ന ഇവര്‍ തമിഴ്‌നാട്ടില്‍ പഠിക്കുന്ന നേഴ്‌സിംഗ് വിദ്യാര്‍ത്ഥിനികളാണെന്നാണ് സൂചന. തന്റെ പേരില്‍ ആരും വഞ്ചിക്കപ്പെടരുതെന്നതിനാലാണ് ഇക്കാര്യം വെളിപ്പെടുത്തുന്നതെന്നും അമല ഫെയ്‌സ്ബുക്ക് പോസ്റ്റില്‍ പറഞ്ഞു.