‘ദുബായ് ലാംപ്’ പദ്ധതി റിയല്‍ എസ്റ്റേറ്റ് മേഖലയിലേക്കും

ഊര്‍ജസംരക്ഷണവുമായി ബന്ധപ്പെട്ട 'ദുബായ് ലാംപ്' പദ്ധതി പ്രോല്‍സാഹിപ്പിക്കുന്നതിന്റെ ഭാഗമായി ദുബായ് മുനിസിപ്പാലിറ്റി പ്രമുഖ റിയല്‍ എസ്റ്റേറ്റ് കമ്പനികളായ ഇമാര്‍, ദുബായ് പ്രോപ്പര്‍ട്ടീസ് (ഡിപിജി) എന്നിവയുമായി ധാരണാപത്രം ഒപ്പിട്ടു. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം ഉദ്ഘാടനം ചെയ്ത പദ്ധതിയാണിത്. ഗ്രീന്‍ പ്രോപ്പര്‍ട്ടി എന്ന പദ്ധതിപ്രകാരം രണ്ടു റിയല്‍ എസ്റ്റേറ്റ് കമ്പനികളും അവരുടെ പദ്ധതികളില്‍ ദുബായ് ലാംപ് സ്ഥാപിക്കും. ലോകത്ത് ഊര്‍ജ ഉപയോഗം ഏറ്റവും കുറഞ്ഞ എല്‍ഇഡി ലാംപുകള്‍ എന്ന ഖ്യാതിയുള്ളതാണു ദുബായ് ലാംപ്. 25,000 മണിക്കൂര്‍ ആയുസ്സുള്ള ഇവ വൈദ്യുതി ബില്ലില്‍ 90% കുറവു വരുത്തുമെന്നാണു വിലയിരുത്തല്‍.