ഇന്ത്യയ്ക്ക് വന്‍ തിരിച്ചടി : ഓസ്‌ട്രേലിയ തൊഴില്‍ വിസ റദ്ദാക്കി

ഇന്ത്യയ്ക്ക് വന്‍ തിരിച്ചടിയായി ഓസ്‌ട്രേലിയ തൊഴില്‍ വിസ റദ്ദാക്കി. ഓസ്‌ട്രേലിയന്‍ സര്‍ക്കാര്‍ വിദേശ പൗരന്മാര്‍ക്ക് അനുവദിക്കുന്ന താല്‍ക്കാലിക തൊഴില്‍ വിസയായ '457 വിസ' പദ്ധതിയാണ് റദ്ദാക്കിയത്. രാജ്യ താല്‍പ്പര്യം മുന്‍ നിര്‍ത്തി താല്‍ക്കാലിക തൊഴില്‍ വിസ പദ്ധതി റദ്ദാക്കുകയാണെന്ന് പ്രധാനമന്ത്രി മല്‍കോം ടേന്‍ബന്‍ അറിയിച്ചു. ഇത്തരം താല്‍ക്കാലിക തൊഴില്‍ വിസയില്‍ ഏറ്റവും കൂടുതല്‍ സേവനം നേടുന്നത് ഇന്ത്യക്കാരാണ്. രാജ്യത്ത് 95,000 വിദേശപൗരന്മാര്‍ താല്‍ക്കാലിക വിസയില്‍ എത്തുന്നുണ്ടെന്നാണ് കണക്കുകള്‍.

തൊഴിലിടങ്ങളില്‍ സ്വദേശി പൗരന്മാര്‍ക്ക് പ്രഥമ പരിഗണന നടപ്പിലാക്കുന്നതിന്റെ ഭാഗമായാണ് തൊഴില്‍ വിസ റദ്ദാക്കുന്നതെന്ന് പ്രധാനമന്ത്രി വ്യക്തമാക്കി. രാജ്യത്ത് ഇനി മുതല്‍ വിദഗ്ധ തൊഴിലാളികളെ മാത്രമേ അനുവദിക്കാനുള്ള നീക്കമാണ് ഓസ്‌ട്രേലിയയും നടപ്പാക്കുന്നത്. ഇനി മുതല്‍ പാസ്‌പോര്‍ട്ട് ഉണ്ടെങ്കില്‍ ഓസ്‌ട്രേലിയയില്‍ ജോലി ചെയ്യാമെന്നത് അനുവദിക്കാനാകില്ലെന്നും ടേന്‍ബന്‍ കൂട്ടിച്ചേര്‍ത്തു.