ജിഷ്ണുവിന്റെ അമ്മയും സഹോദരിയും നിരാഹാരം അവസാനിപ്പിച്ചു

പാമ്പാടി നെഹ്‌റു കൊളേജ് വിദ്യാര്‍ത്ഥി ജിഷ്ണു പ്രണോയിയുടെ ദുരൂഹ മരണത്തില്‍ നടപടിയെടുക്കാത്തതില്‍ പ്രതിഷേധിച്ച് ജിഷ്ണുവിന്റെ അമ്മയും ബന്ധുക്കളും നടത്തിവന്ന നിരാഹാരം അവസാനിപ്പിച്ചു.പൊലീസിന്റെ ഭാഗത്തു നിന്ന് വീഴ്ച വന്നിട്ടുണ്ടെങ്കില്‍ നടപടിയെടുക്കുമെന്ന പിണറായി വിജയയന്റെ ഉറപ്പിലാണ് സമരം അവസാനിപ്പിക്കാന്‍ തീരുമാനിച്ചത്.ജിഷ്ണുവിന്റെ അമ്മ മഹിജയെ ഫോണില്‍ വിളിച്ചാണ് മുഖ്യമന്ത്രി ഉറപ്പ് നല്‍കിയത്.കൊച്ചിയിലുള്ള മുഖ്യമന്ത്രി തിരിച്ചെത്തിയാലുടന്‍ നടപടിയെടുക്കുമെന്നാണ് സൂചന.കേസുമായി ബന്ധപ്പെട്ട് എല്ലാ പ്രതികളെയും ഉടന്‍ കസ്റ്റഡിയിലെടുക്കുമെന്ന് സ്‌പെഷ്യല്‍ പ്രോസിക്യൂട്ടര്‍ സിപി ഉദയഭാനു ജിഷ്ണുവിന്റെ കുടുംബത്തിനെ അറിയിച്ചു.പൊലീസ് നടപടിയില്‍ പ്രതിഷേധിച്ച് വീട്ടില്‍ നിരാഹാരത്തിലായിരുന്ന സഹോദരിയും മുഖ്യമന്ത്രിയുടെ ഉറപ്പിനെ തുടര്‍ന്ന് നിരാഹാരം അവസാനിപ്പിക്കും.

കുടുംബത്തിന്റെ അഭ്യര്‍ത്ഥന മാനിച്ച സര്‍ക്കാരിനും കൂടെ നിന്ന മാധ്യമങ്ങള്‍ക്കും ജനങ്ങള്‍ക്കും മുഖ്യമന്ത്രിയുടെ ഉറപ്പിനെ തുടര്‍ന്ന് ജിഷ്ണുവിന്റെ കുടുംബം നന്ദി അറിയിച്ചു.കസ്റ്റഡിയിലുള്ള ഷാജിര്‍ഖാനെയും ഭാര്യയെയും ഉടന്‍ മോചിപ്പിക്കുമെന്ന ഉറപ്പും കിട്ടി.എല്ലാ ആവശ്യങ്ങളും സര്‍ക്കാര്‍ അംഗീകരിച്ചു.പൊലീസ് മര്‍ദ്ദിച്ചെന്ന പരാതിയില്‍ ഉറച്ചു നില്‍ക്കുന്നതായും ആരോഗ്യവകുപ്പിനും ബന്ധപ്പെട്ട വകുപ്പുകള്‍ക്കും മര്‍ദ്ദനം നടന്നതായി ബോധ്യപ്പെട്ടതായും ജിഷ്ണുവിന്റെ ബന്ധുക്കള്‍ അറിയിച്ചു.