40 രൂപ ടോളിന് കാര്‍ഡ് സ്വൈപ് ചെയ്ത ഡോക്ടര്‍ക്ക് നഷ്ടം നാല് ലക്ഷം രൂപ

കൊച്ചി-മുംബൈ ദേശീയ പാതയില്‍ 40 രൂപ ടോളിന് വേണ്ടി എ.ടി.എം കാര്‍ഡ് സ്വൈപ് ചെയ്ത ഡോക്ടര്‍ക്ക് നഷ്ടപ്പെട്ടത് നാല് ലക്ഷം രൂപ. ടോള്‍ ബുത്തില്‍ നിന്നയാളുടെ പിഴവ് നിമിത്തമാണ് ഡോക്ടര്‍ക്ക് പണം നഷ്ടപ്പെട്ടത്. ഉടുപ്പിയില്‍ നിന്ന് 18 കിലോമീറ്റര്‍ അകലെയുള്ള ഒരു ടോള്‍ ബൂത്തില്‍ ശനിയാഴ്ച രാത്രിയാണ് സംഭവം നടന്നത്. മൈസുരു സ്വദേശിയായ ഡോ. റാവു മുംബൈയിലേക്കുള്ള യാത്രാമദ്ധ്യേയാണ് ടോള്‍ ബൂത്തില്‍ കാര്‍ഡ് സ്വൈപ് ചെയ്തത്.

ടോള്‍ ബൂത്തിലെ ജീവനക്കാരനാണ് ഡോക്ടറുടെ കാര്‍ഡ് സ്വൈപ് ചെയ്ത് പണം ഈടാക്കിയത്. പണം ഈടാക്കിയ ശേഷം കാര്‍ഡ് തിരികെ നല്‍കിയ ജീവനക്കാരന്‍ 40 രൂപയുടെ ബില്ല് നല്‍കുകയും ചെയ്തു. എന്നാല്‍ ബാങ്കില്‍ നിന്ന് എസ്.എം.എസ് വന്നപ്പോഴാണ് 4 ലക്ഷം രൂപ നഷ്ടപ്പെട്ടതായി വ്യക്തമായത്. അപ്പോള്‍ തന്നെ ടോള്‍ ബൂത്തിലെ ജീവനക്കാരോട് ഇക്കാര്യം പറഞ്ഞുവെങ്കിലും അവര്‍ കുറ്റം സമ്മതിക്കാന്‍ തയ്യാറായില്ല. രണ്ട് മണിക്കൂര്‍ വാദപ്രതിവാദത്തിന് ശേഷവും ജീവനക്കാര്‍ തെറ്റ് സമ്മതിച്ചില്ല.

തുടര്‍ന്ന് അഞ്ച് കിലോമീറ്റര്‍ ഡ്രൈവ് ചെയ്ത് പോയ ഡോക്ടര്‍ അടുത്ത പോലീസ് സ്‌റ്റേഷനില്‍ പരാതി നല്‍കിയ ശേഷം പോലീസുമായി ടോള്‍ ബൂത്തില്‍ എത്തിയാണ് പ്രശ്‌നം പരിഹരിച്ചത്. ഏറെ നേരത്തെ തര്‍ക്കത്തിന് ശേഷം ഒടുവില്‍ അധികമായി പിന്‍വലിച്ച പണത്തിന്റെ ചെക്ക് നല്‍കാമെന്ന് ജീവനക്കാരന്‍ സമ്മതിച്ചു. എന്നാല്‍ തുക പണമായി തന്നെ വേണമെന്ന് ഡോക്ടര്‍ ആവശ്യപ്പെട്ടതിനെ തുടര്‍ന്ന് നാല് മണിയോടെ 3,99,960 രൂപ നല്‍കി പ്രശ്‌നം പരിഹരിച്ചു.