“ചങ്കുണ്ടെങ്കില്‍ അതൊന്നു കാണിക്കണം പിണറായി..” സദാചാര ഗുണ്ടായിസത്തിനെതിരെ നടത്തിയ പ്രതിഷേധ കൂട്ടായ്മയ്‌ക്കെതിരെ അനില്‍ അക്കര

ശിവസേനയുടെ സദാചാര ഗുണ്ടായിസത്തിനെതിരെ കൊച്ചിയില്‍ നടത്തിയ പ്രതിഷേധ കൂട്ടായ്മയ്‌ക്കെതിരെ കോണ്‍ഗ്രസ് എം.എല്‍.എ അനില്‍ അക്കര. ഏത് സ്വാതന്ത്ര്യത്തിന്റെ പേരിലായാലും ചുംബന സമരം അനുവദിക്കരുതെന്ന് വടക്കാഞ്ചേരി എം.എല്‍.എയായ അനില്‍ അക്കര ഫെയ്‌സ്ബുക്ക് പോസ്റ്റില്‍ ആവശ്യപ്പെട്ടു. നട്ടെല്ലുള്ള മുഖ്യമന്ത്രിയാണ് പിണറായിയെങ്കില്‍ നടുറോഡില്‍ ആഭാസം കാട്ടിയ ഈ വൃത്തികെട്ടവന്‍മാര്‍ക്കെതിരെ കേസെടുക്കണം. ചങ്കുണ്ടെങ്കില്‍ അതൊന്നു കാണിക്കണം പിണറായി. അല്ലെങ്കില്‍ ഇവര്‍ പിണറായിയുടെ വാടകക്കാരെന്ന് വിളിക്കേണ്ടി വരും-അനില്‍ അക്കര പറഞ്ഞു.

ബുധനാഴ്ച വൈകുന്നേരമാണ് മറൈന്‍ ഡ്രൈവില്‍ ശിവസേനയുടെ സദാചാര ഗുണ്ടായിസം അരങ്ങേറിയത്. ചൂരലുമായി എത്തിയ ശിവസേന പ്രവര്‍ത്തകര്‍ മറൈന്‍ ഡ്രൈവിലിരുന്ന യുവതീ-യുവാക്കളെ വിരട്ടിയോടിക്കുകയായിരുന്നു. ഇരുപതോളം ശിവസേന പ്രവര്‍ത്തകരാണ് മറൈന്‍ ഡ്രൈവില്‍ അഴിഞ്ഞാടിയത്. യുവതീ-യുവാക്കള്‍ക്കെതിരെ കേട്ടാലറയ്ക്കുന്ന അസഭ്യ പ്രയോഗവും ശിവസേന പ്രവര്‍ത്തകര്‍ നടത്തി. ശിവസേനയുടെ ഗുണ്ടായിസം നോക്കി നിന്ന പേലീസുകാര്‍ക്കെതിരെ സര്‍ക്കാര്‍ നടപടി സ്വീകരിക്കുകയും ചെയ്തിരുന്നു.

ശിവസേനയുടെ സദാചാര പോലീസിംഗിനെതിരെ ഇന്നലെ വൈകുന്നേരമാണ് കിസ് ഓഫ് ലൗ പ്രവര്‍ത്തകര്‍ ചുംബന സമരം നടത്തിയത്. ഡി.വൈ.എഫ്.ഐ അടക്കം വിവിധ രാഷ്ട്രീയ സംഘടനകളും മറൈന്‍ ഡ്രൈവില്‍ പ്രതിഷേധ കൂട്ടായ്മകള്‍ സംഘടിപ്പിച്ചിരുന്നു.