ദുബായ് ഭരണാധികാരിയുടെ സന്തോഷ പുസ്തകം പുറത്തിറങ്ങി

ദുബായ് ഭരണാധികാരി ഷെയ്ഖ് മുഹമ്മദ് ബിന്‍ റാഷിദ് അല്‍ മഖ്തൂം രചിച്ച സന്തോഷത്തിന്റെയും ശുഭാപ്തി വിശ്വാസത്തിന്റെയും വീക്ഷണങ്ങളുള്‍ക്കൊള്ളുന്ന അറബിക് പുസ്തകം പുറത്തിറങ്ങി.'താ മുലാത് ഫി അസഅദ അല്‍ വാജിയ',എന്നാണ് പുസ്തകത്തിന്റെ അറബിനാമം.ഭരണ,വികസന,സാംസ്‌ക്കാരിക മേഖലകളില്‍ എങ്ങനെസന്തോഷവും ശുഭാപ്തി വിശ്വാസവും വളര്‍ത്താം എന്ന ചിന്തയെ അടിസ്ഥാനമാക്കിയാണ് പുസ്തക രചന.അറബ് ജനതയ്ക്ക് ആത്മ വിശ്വാസം നല്‍കി ജീവിക്കാന്‍ പ്രാപ്തരാക്കുക എന്ന തത്വമാണ് പുസ്തകത്തിന്റെ ആത്യന്തിക ലക്ഷ്യം.

നാടിന്റെ വികസനത്തില്‍ ഷെയ്ഖ് മുഹമ്മദ് എന്ന ഭരണാധികാരിയുടെ അറിവ് പുസ്തകത്തില്‍ പ്രതിപാദിക്കുന്നു.24 അധ്യായങ്ങളാണ് പുസ്തകത്തിലുള്ളത്.അറബ് യുവാക്കളെ ആകര്‍ഷിക്കാനും ഉദ്‌ബോധിപ്പിക്കാനും ഉതകുന്ന തരത്തിലാണ് പുസ്തകം ക്രമീകരിച്ചിരിക്കുന്നത്.ദുബായ് ഭരണാധികാരി എന്ന നിലയില്‍ അദ്ദേഹം കടന്നു പോയ വഴികളാണ് പുസ്തകത്തിലെ പ്രധാന പ്രതിപാദനം.

മുന്‍പ് ഫ്‌ലാഷസ് ഓഫ് തോട്‌സ്,മൈ വിഷന്‍ എന്നീ പുസ്തകങ്ങള്‍ ഷെയ്ഖ് മുഹമ്മദ് രചിച്ചിട്ടുണ്ട്.ഈ രണ്ടു പുസ്തകങ്ങളും ഇംഗ്ലീഷിലും മലയാളത്തിലും വിവര്‍ത്തനം ചെയ്യപ്പെട്ടിട്ടുമുണ്ട്.