പ്രായപൂര്‍ത്തിയാകാത്ത പെണ്‍കുട്ടിയെ ലൈംഗികമായി ചൂഷണം ചെയ്‌തെന്നാരോപിച്ച് ഇന്‍ഡ്യന്‍ അത്‌ലറ്റ് ന്യൂയോര്‍ക്കില്‍ അറസ്റ്റിലായി

യു എസ് ന്യായാധിപന്‍മാരുടെയും പ്രാദേശിക മേയറുടെയും സഹായത്തോടെ വീസാ നിരസിക്കലിനെ മറികടന്ന് യുഎസിലെത്തിയ ഇന്‍ഡ്യന്‍ അത്‌ലറ്റാണ് ലൈംഗീകാതിക്രമത്തിന് അറസ്റ്റിലായത്.അമേരിക്കയില്‍ സ്‌നോ ഷൂ ചാമ്പ്യന്‍ഷിപ്പില്‍ പങ്കെടുക്കാനെത്തിയ തന്‍വീര്‍ ഹുസൈനാണ് പെണ്‍കുട്ടിയെ പീഡിപ്പിച്ചെന്ന ആരോപണത്തെ തുടര്‍ന്ന് പൊലീസ് പിടിയിലായത്.ഇയാളുടെ അറസ്റ്റ് ഇന്‍ഡ്യന്‍ സ്‌നോ ഷൂ ഫെഡറേഷന്‍ പ്രസിഡന്റും കോച്ചുമായ മുദാസിര്‍ മിര്‍ സ്ഥിരീകരിച്ചിട്ടുണ്ട്.എന്നാല്‍ സംഭവത്തില്‍ ഹുസൈന്‍ നിരപരാധിയാണെന്ന് മിര്‍ അറിയിച്ചിട്ടുണ്ട്.അടുത്ത തിങ്കളാഴ്ച ഇയാളെ കോടതിയില്‍ ഹാജരാക്കും.'ഈ സംഭവം ഇന്‍ഡ്യക്കാര്‍ക്കും ഫെഡറേഷനും നാണക്കേടുളവാക്കുന്നതാണെന്നും,അമേരിക്കന്‍ നീതിന്യായ വ്യവസ്ഥിതിയില്‍ വിശ്വാസമുണ്ടെന്നും',മിര്‍ പറഞ്ഞു.