ജിഷ്ണുവിന്റെ ആത്മഹത്യ:കൃഷ്ണദാസിന് മുന്‍കൂര്‍ ജാമ്യം,കൊളേജില്‍ പ്രവേശിക്കരുതെന്ന് കോടതി

പാമ്പാടി നെഹ്‌റു കോളജ് വിദ്യാര്‍ഥി ജിഷ്ണു പ്രണോയ് ആത്മഹത്യ ചെയ്ത കേസില്‍ നെഹ്‌റു ഗ്രൂപ് ചെയര്‍മാന്‍ പി.കൃഷ്ണദാസിന് ഹൈകോടതി മുന്‍കൂര്‍ ജാമ്യം അനുവദിച്ചു. കൃഷ്ണദാസിനെ കേസില്‍ പ്രതിയാക്കാന്‍ മതിയായ തെളിവുകള്‍ ഹാജരാക്കാന്‍ പ്രോസിക്യൂഷന് കഴിഞ്ഞിട്ടില്ലെന്ന് കോടതി വ്യക്തമാക്കി. പ്രത്യേകിച്ചും പ്രേരണക്കുറ്റം ചുമത്താന്‍ മതിയായ തെളിവുകള്‍ ഹാജരാക്കാന്‍ കഴിഞ്ഞിട്ടില്ലെന്നും ഹൈകോടതി നിരീക്ഷിച്ചു. പ്രോസിക്യൂഷന്റെ വാദങ്ങള്‍ പൂര്‍ണമായും തള്ളിയ കോടതി അന്വേഷണം നടക്കുന്ന കാലയളവില്‍ കോളജില്‍ പ്രവേശിക്കരുതെന്ന് കൃഷ്ണദാസിനോട് നിര്‍ദേശിച്ചിട്ടുണ്ട്.

ജിഷ്ണുവിന്റെ മരണത്തില്‍ കൃഷ്ണദാസിനും മാനേജ്‌മെന്റിനും നേരിട്ടു പങ്കുണ്ടെന്ന് സ്‌പെഷല്‍ പ്രോസിക്യൂട്ടര്‍ സി.പി. ഉദയഭാനു കഴിഞ്ഞ ദിവസം ഹൈകോടതിയില്‍ ബോധിപ്പിച്ചിരുന്നു. കേസ് ഡയറിയും സാങ്കേതിക സര്‍വകലാശാലയുടെ അന്വേഷണ റിപ്പോര്‍ട്ടും ഉള്‍പ്പെടെയുള്ള രേഖകളും കോടതിക്ക് കൈമാറിയിരുന്നു. കോളജിന്റെ ദൈനംദിന കാര്യങ്ങളില്‍ കൃഷ്ണദാസ് ഇടപെടാറില്ലെന്നും മരണം നടന്ന ദിവസം മറ്റൊരു മെഡിക്കല്‍ കൗണ്‍സിലിന്റെ യോഗത്തില്‍ പങ്കെടുക്കുകയായിരുന്നു എന്നുമാണ് മാനേജ്‌മെന്റ് ഹൈകോടതിയില്‍ വാദിച്ചത്. ഇത് അംഗീകരിച്ചാണ് കോടതി കൃഷ്ണദാസിന് ജാമ്യം അനുവദിച്ചത്.