ചോരുന്ന പിന്തുണ,ശശികലയുടെ കണ്ണ് വെട്ടിച്ച് മൂന്നു എം പി മാര്‍ കൂടി പനീര്‍ശെല്‍വത്തിനൊപ്പം

തമിഴ്‌നാട്ടില്‍ രാഷ്ട്രീയ നാടകം തുടരുന്നതിനിടെ ശശികല ക്യാമ്പില്‍ നിന്നും മൂന്നു പേര്‍ കൂടി ഒ പി എസ് പക്ഷത്തെത്തി.എം പി മാരായ ജയ്‌സിങ് ത്യാഗരാജ് നട്ടര്‍ജി,സെങ്കുട്ടുവന്‍,ആര്‍ പി മരുതു രാജ എന്നിവരാണ് പനീര്‍ശെല്‍വത്തിന് പിന്തുണ പ്രഖ്യാപിച്ചത്.ഇതോടെ ഒ പി എസിനെ പിന്തുണയ്ക്കുന്ന എം പി മാരുടെ എണ്ണം ഏഴായി.എം പി മാരായ പി ആര്‍ സുന്ദരം,സത്യഭാമ ,വനറോജ,അശോക് കുമാര്‍ എന്നിവരാണ് ശശികല ക്യാമ്പ് വിട്ട് വന്ന മറ്റ് എം പി മാര്‍.

എം പി മാരേ കൂടാതെ മന്ത്രിമാരായ കെ പാണ്ഡ്യരാജന്‍(വിദ്യാഭ്യാസം)പി കെ ജയകുമാര്‍(ഫിഷറീസ്)എന്നിവരും ശശികലയുടെ വിശ്വസ്തനും എ ഐ ഡി എം കെ സ്ഥാപകരിലൊരാളായ പൊന്നയ്യനും ഇപ്പോള്‍ ഒ പി എസ് പക്ഷത്ത് നിലയുറപ്പിച്ചിരിക്കുകയാണ്. ഇതിനിടെ സര്‍ക്കാരുണ്ടാക്കുന്നതുമായിബന്ധപ്പെട്ട് ഗവര്‍ണര്‍ വിദ്യാസാഗര്‍ റാവുവിന്റെ തീരുമാനം നീളുകയാണ്.ശശികലയുള്‍പ്പെട്ട അനധികൃത സ്വത്തു സമ്പാദനക്കേസില്‍ സുപ്രീം കോടതി വിധിയ്ക്കായിട്ടായിരിക്കണം ഗവര്‍ണര്‍ മൗനം പാലിക്കുന്നത്.വിധി നാളെ വരുമെന്നാണ് സ്ഥിരീകരിക്കാത്ത റിപ്പോര്‍ട്ടുകള്‍