സൈക്കിളില്‍ തന്ത്രമൊരുക്കിയ അച്ഛന്‍

നിയമസഭാ തെരഞ്ഞെടുപ്പിന് കളമൊരുങ്ങിയ നാളു മുതല്‍ ഉത്തരദേശം യാദവപ്പോരില്‍ വെന്തുരുകുകയായിരുന്നു.ഉത്തര്‍പ്രദേശ് സമാജ് വാദി പാര്‍ട്ടിയിലുണ്ടായ കലഹവും വേര്‍പിരിയലും തെരഞ്ഞെടുപ്പ് ഫലത്തെ ബാധിക്കുമോ?അതല്ല ഇവിടെ പ്രശ്‌നം തെരഞ്ഞെടുപ്പെന്ന യാഥാര്‍ത്ഥ്യത്തോടടുത്തപ്പോള്‍ കഴിഞ്ഞ അഞ്ചു വര്‍ഷക്കാലം സംസ്ഥാനത്തുണ്ടായ മാറ്റങ്ങളെക്കുറിച്ച് മുഖ്യധാരയില്‍ ചര്‍ച്ചാ വിഷയമാകാതിരിക്കാന്‍ മുലായം സിങ് എന്ന രാഷ്ട്രീയ തന്ത്രജ്ഞന്റെ തലയിലുദിച്ച ബുദ്ധിയാണ് യാദവപ്പോര്.അതിന്റെ കാരണം 2014 ലോക് സഭാ തെരഞ്ഞെടുപ്പിന്റെ ഫലമാണ്.അതായത് 42.3 % വോട്ട് ഷെയറോടെ ബി ജെ പി 80 ല്‍ 71 സീറ്റുകളിലും വിജയിച്ചു.സംസ്ഥാനം ഭരിച്ചു കൊണ്ടിരുന്ന മുലായം സിങ് യാദവിന്റെയും മകന്‍ അഖിലേഷ് യാദവിന്റെയും പാര്‍ട്ടിയായ സമാജ് വാദി പാര്‍ട്ടിക്ക് നേടാനായത് വെറും 5 സീറ്റുകള്‍ മാത്രമാണ്.2012 നിയമസഭ തെരഞ്ഞെടുപ്പില്‍ 229 സീറ്റുകള്‍ നേടി അധികാരത്തിലെത്തിയ പാര്‍ട്ടിയാണ് എസ് പി.പക്ഷെ ഭരണ ദുര്‍ബലതയും രാജ്യത്താകമാനമുണ്ടായ ബി ജെ പി അനുകൂല തരംഗവും ലോക്‌സഭ തെരഞ്ഞെടുപ്പില്‍ എസ് പി യെ പിടിച്ചുലച്ചു.അവിടെയാണ് ചാണക്യ തന്ത്രത്തിന്റെ പ്രസക്തി.

അന്നു തുടങ്ങിയ ബി ജെ പി അനുകൂല കാലാവസ്ഥ മാറ്റമില്ലാതെ തുടരുകയും അഖിലേഷിന്റെ ഭരണത്തിന് യു പി ക്ക് വലിയ തോതില്‍ വളര്‍ച്ച നേടാനാകാതെ വരികയും ചെയ്തത് ബി ജെ പി യ്ക്കു ഗുണം ചെയ്യുമെന്ന് മനസിലാക്കിയ അച്ഛന്‍ മുലായം സിങ് യാദവ് ഇമ്മിണി വലിയ കളിക്കിറങ്ങുകയായിരുന്നു.അച്ഛനായാലും മകനായാലും ലക്ഷ്യം ഭരണം തന്നെ.എങ്കില്‍ പിന്നെ ഇത്തിരി നാറിയാലും അധികാരത്തിലെത്തിയാല്‍ ആ നാറ്റമങ്ങു കഴുകി കളയാമല്ലോ എന്ന്.അതുകൊണ്ടാണ് സ്വന്തം മകനെയും സ്വന്തം പാര്‍ട്ടിയെയും കൊണ്ടാണ് മുലായം കളിക്കിറങ്ങിയത്.അച്ഛനും മകനും തമ്മില്‍ പ്രശ്‌നങ്ങളുണ്ടെന്ന് വരുത്തി തീര്‍ക്കുകയും അതങ്ങ് നല്ലപോലെ ആളിക്കത്തിക്കുകയും ചെയ്തു. ഭരണവിരുദ്ധ തരംഗവും സംസ്ഥാനത്തുണ്ടായ മാറ്റങ്ങളുമൊന്നും ആരും ചര്‍ച്ച ചെയ്യാത്ത രീതിയില്‍ യാദവപ്പോര് പൊരിഞ്ഞു.

അച്ഛനും മകനും കണ്ടാല്‍ ഒന്നു ചിരിക്കുക കൂടി ചെയ്യാതയായി.തെറ്റിപ്പിരിഞ്ഞ അച്ഛന് പക്ഷെ സമാജ് വാദി പാര്‍ട്ടിയുടെ തെരഞ്ഞെടുപ്പ് ചിഹ്നമായ സൈക്കിള്‍ ലഭിച്ചില്ല.സൈക്കിള്‍ ചിഹ്നം അഖിലേഷ് സ്വന്തമാക്കി.പക്ഷെ അച്ഛന്‍ മകനു വേണ്ടി ചെയ്ത ത്യാഗമാണ് ഈവിട്ടു നല്‍കല്‍ എന്നു കരുതാനാവില്ല.കപടനാടകത്തിനൊടുവില്‍ അച്ഛന്റെ പാര്‍ട്ടിയും ചിഹ്നവും മകന് സ്വന്തം.മകനായാലും അച്ഛനായാലും കളിച്ച കളിയങ്ങ് രക്ഷപെട്ടു.സംസ്ഥാനത്തെ പ്രശ്‌നങ്ങളെക്കുറിച്ചൊന്നും ആരും പറഞ്ഞില്ല.നവമാധ്യമങ്ങളും മറ്റ് മാധ്യമങ്ങളും എന്തിനേറെ പത്രം പോലും തെരഞ്ഞെടുപ്പിനെ സ്വാധീനിക്കാത്ത ഉത്തര്‍പ്രദേശില്‍ അച്ഛന്റെ മകന്‍ ചുളിവിലങ്ങ് കാര്യം നേടി.

പാര്‍ട്ടി പിടിച്ചടക്കിയെന്നവകാശപ്പെടുന്ന അഖിലേഷ് ബി ജെ പിയുമായങ്ങ് സഖ്യമുണ്ടാക്കി.ഈ കളിയില്‍ രക്ഷപെട്ടാല് കൂടെ രക്ഷപെടുന്നത് ദേശീയ പാര്‍ട്ടിയായ കോണ്‍ഗ്രസ് കൂടിയാവും.ബി ജെ പി യെ വെല്ലാന്‍ തല്‍ക്കാലം കോണ്‍ഗ്രസിനും മറ്റ് മാര്‍ഗമൊന്നുമില്ല.കഴിഞ്ഞ ലോക്‌സഭാ തെരഞ്ഞെടുപ്പില്‍ രണ്ട് സീറ്റാണ് യു പി യില്‍ നിന്ന് കോണ്‍ഗ്രസിന് നേടാനായത്. പുതിയ സഖ്യത്തില്‍ എസ് പി 298 സീറ്റിലും കോണ്‍ഗ്രസ് 105 സീറ്റിലും മല്‍സരിക്കും.'ഈസി ഗോയിങ്'എന്നു കരുതിയിരുന്ന ബി ജെ പിയുടെ നില പരുങ്ങലിലുമായി.അച്ഛന്‍ മകന്‍ പോര് തിരിച്ചടിക്കുന്നത് ബി ജെ പി യെ തന്നെയായിരിക്കുമെന്ന് വ്യക്തം.ന്യൂനപക്ഷ വോട്ടുകള്‍ ഭിന്നിക്കുമെന്ന് കരുതിയ ബി ജെ പിയ്ക്ക് വലിയ വെല്ലുവിളി തന്നെ യു പി നല്‍കും.നോട്ട് പിന്‍വലിക്കലും ബി ജെ പിയെ തിരിഞ്ഞു കൊത്തി.

അച്ഛന്‍ കളിച്ചത് തീക്കളി,പക്ഷെ മകന് എത്തുന്നത് സ്വര്‍ണ സിംഹാസനത്തിലേക്ക്.കൈപൊള്ളുന്നത് ബി ജെ പിയ്ക്ക്.ഇതിനിടെ ബി എസ് പിയ്ക്ക് എന്തു സംഭവിക്കും.കഴിഞ്ഞ തവണ രണ്ടാമതെത്തി.ഒന്നാമനാകാന്‍ ഓടുന്ന ബി എസ് പി മൂന്നാമതെങ്കിലും എത്തിയാല്‍ കൊള്ളാം.

ടഫബ്രുവരി 11 ന് ആരംഭിക്കുന്ന തെരഞ്ഞെടുപ്പ് ഏഴു ഘട്ടങ്ങളിലായാണ് യു പി യില്‍ പൂര്‍ത്തിയാകുന്നത്.മാര്‍ച്ച് 11ന് ഫലമറിയുമ്പോള്‍ സിംഹാസനമേറാന്‍ അഖിലേഷിന് അച്ഛന്‍ നല്‍കിയ സൈക്കിള്‍ മതിയാകുമോ?