‘ആണ്‍കുട്ടികളോട് സംസാരിക്കുന്നു’; മകളെ കനാലില്‍ തള്ളിയിട്ട് മാതാപിതാക്കള്‍

മീററ്റ് അഞ്ചാം ക്ലാസ് വിദ്യാര്‍ഥിനിയെ മൂന്നു ദിവസമായി കാണാതായ സംഭവത്തില്‍ മാതാപിതാക്കള്‍ അറസ്റ്റില്‍. മകളെ കനാലില്‍ തള്ളിയിട്ടു കൊലപ്പെടുത്താന്‍ ശ്രമിച്ചെന്ന കുറ്റത്തിനാണ് ഇരുവരെയും അറസ്റ്റ് ചെയ്തത്. കുട്ടിയെ ഇതുവരെയും കണ്ടെത്താനായില്ലെന്നു പൊലീസ് പറഞ്ഞു. ഉത്തര്‍പ്രദേശിലെ മീററ്റ് സ്വദേശികളായ ബബ്ലൂ, ഭാര്യ റൂബി എന്നിവരാണ് പ്രതികള്‍. അനേകം ആണ്‍കുട്ടികളുമായി സംസാരിക്കുന്നതും മോശം ആംഗ്യങ്ങള്‍ കാണിക്കുന്നതുമാണു മകള്‍ക്കെതിരെ രോഷമുണ്ടാക്കിയതെന്നു മാതാപിതാക്കള്‍ പൊലീസിനു മൊഴി നല്‍കി. ''അഞ്ചാം ക്ലാസ് വിദ്യാര്‍ഥിയായ മകളെ കാണാനില്ലെന്നു ബബ്ലൂവും റൂബിയും സെപ്റ്റംബര്‍ ഒന്നിനാണു പരാതി നല്‍കിയത്. തുടര്‍ന്നുള്ള അന്വേഷണത്തില്‍ സംശയം തോന്നി ഇരുവരെയും അറസ്റ്റ് ചെയ്യുകയായിരുന്നു''- മീററ്റ് എസ്പി കേശവ് കുമാര്‍ പറഞ്ഞു. കുട്ടിയെ കനാലില്‍ തള്ളിയിട്ടതായി അന്വേഷണത്തില്‍ കണ്ടെത്തി. കുറ്റം ചെയ്തതായി ദമ്പതികള്‍ ചോദ്യം ചെയ്യലില്‍ സമ്മതിച്ചു. ഇവര്‍ നല്‍കിയ വിവരങ്ങള്‍ പ്രകാരം കുട്ടിയെ കണ്ടെത്താനുള്ള ശ്രമം തുടരുകയാണെന്നും പൊലീസ് വ്യക്തമാക്കി.