ഗവര്‍ണര്‍ മോദി ഭരണത്തിന്റെ കമാന്‍ഡര്‍ ഇന്‍ ചീഫ് ആകാന്‍ ശ്രമിക്കുന്നു; വിമര്‍ശിച്ച് കോടിയേരി

തിരുവവന്തപുരം: കേരളത്തില്‍ ഗവര്‍ണറും സര്‍ക്കാരും രണ്ടു പക്ഷത്ത് നിലയുറപ്പിച്ചിരിക്കുകയാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. മോദി സര്‍ക്കാരിന്റെ രാഷ്ട്രീയനയത്തെ എതിര്‍ക്കുന്നവരും പ്രതികൂലിക്കുന്നവരുമെന്ന ചേരിതിരിവാണിതെന്ന് കോടിയേരി അഭിപ്രായപ്പെട്ടു. ഗവര്‍ണര്‍ മോദി ഭരണത്തിന്റെ കമാന്‍ഡര്‍ ഇന്‍ ചീഫ് ആകാനുളള ശ്രമമാണ് നടത്തുന്നതെന്നും പാര്‍ട്ടി മുഖപത്രത്തിലെ ലേഖനത്തില്‍ കോടിയേരി ചൂണ്ടിക്കാട്ടി. ഗവര്‍ണറുടെ ഭാഗത്തുനിന്ന് സംഭവിക്കാന്‍ പാടില്ലാത്ത പലതുമുണ്ടായി. എന്നിട്ടും മുഖ്യമന്ത്രിയും സര്‍ക്കാരും തികഞ്ഞ ക്ഷമയോെട സംയമനം പാലിച്ച് സ്‌ഫോടനാവസ്ഥ ഒഴിവാക്കുകയായിരുന്നു. തിരഞ്ഞെടുത്ത സര്‍ക്കാര്‍ നിലനില്‍ക്കെ സമാന്തര ഭരണം ഗവര്‍ണര്‍ക്ക് അടിച്ചേല്‍പിക്കാനാകില്ല. ഭരണഘടന വ്യവസ്ഥകള്‍ പരിശോധിക്കാനും ആസ്വദിക്കാനും ഗവര്‍ണര്‍ക്ക് കഴിയും. എന്നാല്‍ ഭരണഘടനയ്ക്ക് വിധേയമാകാതെ പ്രവര്‍ത്തിക്കുകയും പറയുകയും ചെയ്യുന്നത് വഴിതെറ്റലാണ്. അത്തരം വളയമില്ലാത്ത ചാട്ടം ഗവര്‍ണര്‍ അവസാനിപ്പിക്കണമെന്ന് കോടിയേരി ആവശ്യപ്പെട്ടു.