‘കുതിരക്കച്ചവടത്തിനും ജിഎസ്ടി’: നാക്കുപിഴച്ച് നിര്‍മല സീതാരാമന്‍; ട്രോള്‍

ന്യൂഡല്‍ഹി: കുതിരപ്പന്തയത്തിന് ജിഎസ്ടി ഏര്‍പ്പെടുത്തിയതിനെക്കുറിച്ചു സംസാരിക്കുന്നതിനിടെ നാക്കുപിഴച്ച് കേന്ദ്ര ധനമന്ത്രി നിര്‍മല സീതാരാമന്‍. ജിഎസ്ടി കൗണ്‍സില്‍ യോഗത്തിനു ശേഷം ജിഎസ്ടി പരിഷ്‌കരണം വിശദീകരിച്ച് വാര്‍ത്താസമ്മേളനം നടത്തുന്നതിനിടെയാണ് നിര്‍മല സീതാരാമന്റെ നാക്കുപിഴ. കുതിരപ്പന്തയത്തിന് ജിഎസ്ടിയെന്നു പറയേണ്ടതിനു പകരം മന്ത്രി പറഞ്ഞത് കുതിരക്കച്ചവടം എന്നായിപ്പോയി. അബദ്ധം മനസ്സിലാക്കിയ മന്ത്രി ഉടനെ തന്നെ തെറ്റു തിരുത്തി മാറ്റിപറയുന്നുണ്ടെങ്കിലും വിഡിയോ പുറത്തായതോടെ പ്രതിപക്ഷവും സൈബര്‍ലോകവും നാക്കുപിഴ ആഘോഷമാക്കി. മഹാരാഷ്ട്രയില്‍ അരങ്ങേറുന്ന സംഭവവികാസങ്ങളുടെ സാഹചര്യം ചൂണ്ടിക്കാട്ടിയാണ് പ്രതിപക്ഷം നാക്കുപിഴയെ ആയുധമാക്കിയത്. 'നിര്‍മല സീതാരാമന് ബാലറ്റ് ബോക്‌സിന് പുറത്ത് ചിന്തിക്കാനുള്ള കഴിവുണ്ടെന്ന് എനിക്കറിയാമായിരുന്നു.' കോണ്‍ഗ്രസിന്റെ മീഡിയ പബ്ലിസിറ്റി ചെയര്‍മാന്‍ പവന്‍ ഖേര ട്വിറ്ററില്‍ കുറിച്ചു. കുതിരക്കച്ചവടത്തിന് ജിഎസ്ടി ഏര്‍പ്പെടുത്താനുള്ള നിര്‍മല സീതാരാമന്‍ജിയുടെ നിര്‍ദേശത്തെ സ്വാഗതം ചെയ്യുന്നെന്ന് കോണ്‍ഗ്രസ് സെക്രട്ടറി വിനീത് പുനിയയും ട്വീറ്റ് ചെയ്തു. 'സത്യം പുറത്തുവരുമോ? കുതിരക്കച്ചവടത്തിന് ജിഎസ്ടി! ദയവായി മുന്നോട്ട് പോകൂ' എന്നാണ് സിപിഎം ജനറല്‍ സെക്രട്ടറി സീതാറാം യച്ചൂരി ട്വീറ്റ് ചെയ്തത്.