അണ്ണാ ഡിഎംകെ ജനറല്‍ കൗണ്‍സില്‍ യോഗം ഇന്ന്

അണ്ണാ ഡിഎംകെ ജനറല്‍ കൗണ്‍സില്‍ യോഗം ഇന്നു നടക്കും. രാവിലെ പത്തു മണിയ്ക്ക് ചെന്നൈ വാനഗരത്താണ് യോഗം ചേരുക. യോഗം റദ്ദാക്കണമെന്നാവശ്യപ്പെട്ടു കൊണ്ട് പാര്‍ട്ടി കോ-ഓര്‍ഡിനേറ്റര്‍ ഒ പനീര്‍ശെല്‍വം നല്‍കിയ ഹര്‍ജി മദ്രാസ് ഹൈക്കോടതി തള്ളിയിരുന്നു. കൂടാതെ, യോഗത്തില്‍ പുതിയ തീരുമാനങ്ങള്‍ എടുക്കാമെന്നും പാര്‍ട്ടി ബൈലോയില്‍ ഭേദഗതികള്‍ വരുത്താമെന്നും കോടതി പറഞ്ഞു. രാഷ്ട്രീയ പാര്‍ട്ടികളുടെ ഇത്തരം കാര്യങ്ങളില്‍ കോടതി ഇടപെടുന്നില്ലെന്നും ജസ്റ്റിസ് കൃഷ്ണന്‍ രാമസ്വാമി നിരീക്ഷിച്ചു. ഇരുപക്ഷത്തുമായി നിലയുറപ്പിച്ചിട്ടുള്ള അണ്ണാ ഡിഎംകെ അണികള്‍ എടപ്പാടി പഴനി സാമിയ്ക്ക് അനുകൂല നിലപാടാണ് നിലവില്‍ എടുത്തിട്ടുള്ളത്. 2625 പേരാണ് ജനറല്‍ കൗണ്‍സില്‍ അംഗങ്ങള്‍. ഇതില്‍ 2505 പേരും ഇപിഎസിന് അനുകൂലമായി രംഗത്തുണ്ട്. ഈ സാഹചര്യത്തിലായിരുന്നു യോഗം മാറ്റണമെന്നും നേരത്തെ തയ്യാറാക്കിയ അജന്‍ഡയിലെ 23 വിഷയങ്ങള്‍ മാത്രമെ ചര്‍ച്ച ചെയ്യാവു എന്ന ആവശ്യവുമായി ഒപിഎസ് കോടതിയെ സമീപിച്ചത്. പനീര്‍ശെല്‍വം യോഗത്തില്‍ പങ്കെടുക്കുമോ എന്ന കാര്യത്തില്‍ ഇപ്പോഴും വ്യക്തതയില്ല. കോ-ഓര്‍ഡിനേറ്റര്‍, ജോയിന്റ് കോ-ഓര്‍ഡിനേറ്റര്‍ മാതൃകയില്‍ പാര്‍ട്ടിയുടെ ഭരണം മുന്നോട്ടു കൊണ്ടുപോകാന്‍ 2017 ലാണ് ജനറല്‍ കൗണ്‍സില്‍ തീരുമാനിച്ചത്. ഈ തീരുമാനത്തില്‍ ഭേദഗതി ഉണ്ടാകാനുള്ള സാധ്യതയുണ്ട്. ഒറ്റ നേതൃത്വം എന്ന നിലയില്‍ ഭേദഗതി വന്നാല്‍, ഒപിഎസിന് പാര്‍ട്ടിയില്‍ സ്ഥാനങ്ങള്‍ ഇല്ലാതാകും.