ഏറ്റവും കൂടുതല്‍ രക്തം ദാനംചെയ്ത സംഘടന; നേട്ടം സ്വന്തമാക്കി ഡിവൈഎഫ്‌ഐ ആലപ്പുഴ ജില്ലാ കമ്മിറ്റി

സംസ്ഥാനത്ത് ഏറ്റവും കൂടുതല്‍ രക്തം ദാനംചെയ്ത സംഘടനയെന്ന നേട്ടം സ്വന്തമാക്കി ഡിവൈഎഫ്‌ഐ ആലപ്പുഴ ജില്ലാ കമ്മിറ്റി. ഒരു വര്‍ഷത്തിനിടെ 3,720 തവണയാണ് ഡിവൈഎഫ്‌ഐ ജില്ലാ കമ്മിറ്റിയില്‍ നിന്നും രക്തദാനം നടത്തിയത്. ഒരുവര്‍ഷം സംസ്ഥാനതലത്തില്‍ ഏറ്റവും കൂടുതല്‍ രക്തംദാനം ചെയ്ത സംഘടനകള്‍ക്കു സര്‍ക്കാര്‍ നല്‍കുന്ന പുരസ്‌കാരമാണ് ആലപ്പുഴയിലെ ഡിവൈഎഫ്‌ഐയെ തേടിയെത്തിയത്. കോവിഡ് കാലത്ത് രക്തം ലഭിക്കാതെ വന്നപ്പോഴാണ് ആലപ്പുഴ മെഡിക്കല്‍ കോളേജില്‍ ഡിവൈഎഫ്‌ഐ പ്രവര്‍ത്തകര്‍ രക്തദാനം നടത്തിയത്. കടപ്പുറത്തെ സ്ത്രീകളുടെയും കുട്ടികളുടെയും ആശുപത്രിയിലും മാവേലിക്കര ജില്ലാ ആശുപത്രിയിലും മുന്നൂറോളം രക്തദാനം നടത്തിയിരുന്നു. കൂടാതെ, എല്ലാദിവസവും ആലപ്പുഴ മെഡിക്കല്‍ കോളേജില്‍ 'ഹൃദയപൂര്‍വം' ഭക്ഷണവിതരണത്തിന്റെ ഭാഗമായി ദിവസവും 10 പേര്‍ രക്തദാനം ചെയ്യുന്നുണ്ട്. തിരുവന്തപുരത്തു നടന്ന ചടങ്ങില്‍ മന്ത്രി വീണാ ജോര്‍ജില്‍നിന്നു ഡിവൈഎഫ്‌ഐജില്ലാ സെക്രട്ടറി ആര്‍ രാഹുല്‍, പ്രസിഡന്റ് ജയിംസ് ശാമുവേല്‍, ട്രഷറര്‍ രമ്യാ രമണന്‍ എന്നിവര്‍ ചേര്‍ന്നു പുരസ്‌കാരം ഏറ്റുവാങ്ങി.