ഹുറൂബ് കേസില്‍പ്പെട്ട 97 ഇന്ത്യക്കാര്‍ക്ക് നാട്ടിലേക്ക് മടങ്ങാം

ഹുറൂബ് കേസില്‍പ്പെട്ട 97 ഇന്ത്യക്കാര്‍ക്ക് കൂടി ഇന്ത്യന്‍ കോണ്‍സുലേറ്റിന്റെ സഹായത്തോടെ നാട്ടിലേക്ക് മടങ്ങാന്‍ വഴിയൊരുങ്ങി. നാടുകടത്തല്‍ കേന്ദ്രത്തില്‍ നിന്നും ഇവര്‍ക്ക് ഫൈനല്‍ എക്‌സിറ്റ് ലഭിച്ചതായി കോണ്‍സുലേറ്റ് അറിയിച്ചു. തൊഴില്‍ സ്ഥലത്ത് നിന്നും ഒളിച്ചോടിയതായി സ്‌പോണ്‍സര്‍ പരാതിപ്പെട്ട് ഹുറൂബ് കേസില്‍ അകപ്പെട്ട നിരവധി ഇന്ത്യക്കാരാണ് ജിദ്ദ ഇന്ത്യന്‍ കോണ്‍സുലേറ്റിന്റെ സഹായത്തോടെ നാട്ടിലേക്ക് മടങ്ങുന്നത്. കഴിഞ്ഞ ഒരു മാസത്തിനിടെ കേസില്‍പ്പെട്ട ഇരുന്നൂറോളം ഇന്ത്യക്കാണ് ഇങ്ങനെ ഫൈനല്‍ എക്‌സിറ്റ് ലഭിച്ചത്. 24 മണിക്കൂറിനിടെ 97 പേര്‍ക്കാണ് ഫൈനല്‍ എക്‌സിറ്റ് ലഭിച്ചത്. കോണ്‍സുലേറ്റ് ഒരുക്കിയ ബസില്‍ സുമ ഐസ് ഡിപോര്‍ട്ടേഷന്‍ സെന്ററില്‍ എത്തിച്ചാണ് ഫൈനല്‍ എക്‌സിറ്റ് കരസ്ഥമാക്കിയത്. തുടര്‍ന്ന് കോണ്‍സുലേറ്റ് തന്നെ ഇവരെ ജിദ്ദയിലെത്തിച്ചു. 15 ദിവസത്തിനകം നാട്ടിലേക്ക് മടങ്ങുന്ന രീതിയിലാണ് ഫൈനലില്‍ എക്‌സിറ്റ് അടിച്ചത്. നേരത്തെ രജിസ്റ്റര്‍ ചെയ്തവര്‍ക്കാണ് നാട്ടിലേക്ക് മടങ്ങാനുള്ള വഴിയൊരുക്കുന്നത്. ഇന്ത്യന്‍ കോണ്‍സല്‍ ജനറലിന്റെ ശ്രമഫലമായാണ് ഹുറൂബ് കേസില്‍ പെട്ടവര്‍ക്ക് നാട്ടിലേക്ക് മടങ്ങാനുള്ള അവസരമൊരുക്കുന്നത്.