നൂപുര്‍ ശര്‍മയ്ക്കും നവീന്‍ ജിന്‍ഡാലിനും എതിരെ കേസെടുത്ത് ഡല്‍ഹി പൊലീസ്

വിദ്വേഷ പ്രചാരണം നടത്തിയതിന്റെ പേരില്‍ ബിജെപി നേതാക്കളായ നൂപുര്‍ ശര്‍മ, നവീന്‍ കുമാര്‍ ജിന്‍ഡാല്‍ എന്നിവര്‍ക്കെതിരെ കേസെടുത്ത് ഡല്‍ഹി പൊലീസ്. ഇരുവരെയും ബിജെപി നേതൃത്വം സസ്‌പെന്‍ഡ് ചെയ്തിരുന്നു. ക്രമസമാധാനം തകര്‍ക്കുന്ന രീതിയിലുള്ള വിദ്വേഷ സന്ദേശങ്ങള്‍ പ്രചരിപ്പിച്ചതിനാണു നടപടി. സ്‌പെഷല്‍ സെല്ലിന്റെ ഇന്റലിജന്‍സ് ഫ്യൂഷന്‍ ആന്‍ഡ് സ്ട്രാറ്റജിക് ഓപ്പറേഷന്‍സ് (ഐഎസ്എസ്ഒ) ആണ് കേസ് റജിസ്റ്റര്‍ ചെയ്തത്. നൂപുറിനും നവീന്‍ കുമാറിനും പുറമേ പീസ് പാര്‍ട്ടി വക്താവ് ശദബ് ചൗഹാന്‍, മാധ്യമ പ്രവര്‍ത്തക സഭാ നഖ്‌വി, ഹിന്ദു മഹാസഭ നേതാവ് പൂജ ഷകുന്‍ പാണ്ഡെ, രാജസ്ഥാനില്‍നിന്നുള്ള മൗലാന മുഫ്തി നദീം, അബ്ദുര്‍ റഹ്മാന്‍, അനില്‍ കുമാര്‍ മീണ, ഗുല്‍സാര്‍ അന്‍സാരി എന്നിവര്‍ക്കെതിരെയാണ് കേസെടുത്തത്. നൂപുര്‍ ശര്‍മയ്‌ക്കെതിരായ രണ്ടാമത്തെ കേസാണിത്. സമൂഹമാധ്യമങ്ങളില്‍ അസ്വസ്ഥതയുണ്ടാക്കുന്നതിന് തെറ്റായ വിവരങ്ങള്‍ പ്രചരിപ്പിച്ചതിലും അന്വേഷണം നടക്കുകയാണെന്ന് ഡെപ്യൂട്ടി പൊലീസ് കമ്മിഷണര്‍ കെ.പി.എസ്. മല്‍ഹോത്ര പ്രതികരിച്ചു. മതവികാരം വ്രണപ്പെടുത്താന്‍ ഉദ്ദേശിച്ചിരുന്നില്ലെന്നും പരാമര്‍ശം പിന്‍വലിക്കുകയാണെന്നും നൂപുര്‍ ശര്‍മ നേരത്തേ പ്രതികരിച്ചിരുന്നു.